مظفرآباد۔ 04اپریل (اے پی پی) وزیراعظم شاہد خاقان عباسی پارینے کہ پاکستان نا حکومت و الس مقبوضہ کشمیر نا الس نا سیاسی، سفارتی و اخلاقی مخ تفی ءِ برجاتخرہ، پاکستان کشمیر نا ویل انا ایسری کن ہر کہول آ کوشست آتے برجاتخک۔ چارشنبے نادے داڑے کل جماعتی حریت کانفرنس نا نمائندہ غاتون اوڑدہی ٹی ہیت وگپ کرسا شاہد خاقان عباسی پارے کہ او تینٹ و کابینہ باسک آک کشمیری الس تون یکجہتی نا درشانی کن آزاد کشمیر آ بسنو۔ اوپارے کہ بنجائی کابینہ نا خصوصی دیوان اٹی مقبوضہ کشمیر نا الس آ بھارتی فوج انا بیدادی آ سخت غم و غصہ نا درشانی ءِ کننگا۔ وزیراعظم حریت نمائندہ غاتے پارے کہ کابینہ نا خصوصی دیوان اٹی بھارتی فوج انا بیدادی نا شدید مذمت ءِ کننگا۔ وزیراعظم پارے کہ وزارت خارجہ و غٹ سفارتی مشن اقوام متحدہ نا سلامتی کونسل نا قرارداد آتیا عملدرآمد کرفنگ کن متحرک ءِ۔ شاہد خاقان عباسی حریت کانفرنس نا راہشون و نمائندہ غاتا کشمیر نا ویل انا ایسری کن کوشست و قربانی تے خراج تحسین پیش کرے۔ وزیراعظم پارے کہ ہراوڑاٹ مقبوضہ کشمیر نا الس بھارتی بیدادی تون مون تننگ ءِ او قابل قدر ءِ۔ وزیراعظم شاہد خاقان عباسی ساڑی مروک آتے پارے کہ پاکستان نا حکومت 6 اہم ملک آتا دارالحکومت آتیٹی تینا نمائندہ گدریفک تانکہ مقبوضہ کشمیر نا حالیت و ہموڑے جاری انسانی حق انا خلاف ورزی تے مچ آ دنیا ٹی تالان کننگ مرے۔ وزیراعظم تون حریت نمائندہ غاتا اوڑدہی ٹی آزاد کشمیر نا وزیراعظم راجہ فاروق حیدر، صدر آزاد کشمیر سردار مسعود خان، پارلیمنٹ نا کشمیر کمیٹی نا سروک مولانا فضل الرحمان ، وزیر خارجہ خواجہ محمد آصف، وزیر امور کشمیر چوہدری برجیس طاہر ، بنجائی وزیر آک مشاہداللہ، راناتنویر حسین و ممتاز احمد تارڑ ئسک ہم ساڑی ئسر۔ اوڑدہی ٹی حریت راہشون غلام محمد صفی، فیض نقشبندی ، محمود ساگر، اشتیاق حمید، گودی شمیم شال واعجاز لون اوار ئسر۔ داکان مست وزیراعظم شاہد خاقان عباسی مظفر آباد آ سرمس تو صدر آزاد کشمیر سردار مسعود خان، وزیراعظم آزا دکشمیر راجہ فاروق حیدر، اسپیکر آزاد کشمیر کانود ساز اسمبلی و ایلو سینئر کمامدارآک اودے بخیر کریر۔
