اسلام آباد۔2اپریل ( اے پی پی) پاک بحریہ ءِ سروک ایڈمرل ظفر محمود عباسی ءَ گوں ترکش کمانڈر نیول فورسز وائس ایڈمرل عدنان اوزبل ءَ نیول ہیڈکوارٹرز ءَ گندءُ نند کتگ، اے ترءُ تاب دونیمگی ترءُ تابانی ھوالگءِ یک بھر اِت کہ ایشیءِ مو لءُ مراد دوھیں ملک آنی بحری اُردانی نیامءَ سیادیءَ را گیش کنگ اِنت۔ پاک بحریہ ءِ جارچین ءِ گشگءِ ردءَ ہیڈکوارٹر آھگءَ پاک بحریہ ءِ سروک ءَ کمانڈر ترکش نیول فورسز ءَ را وش اَتک کتگ۔ پاک بحریہ ءِ دستہ ءَ مہمانءَ را سلامی پیش کتگ۔ سلامی ءَ پد مہمان ءِ نیول ہیڈکوارٹر ءَ تعینات پرنسپل سٹاف آفیسر ءَ گوں پجار کتگ۔ ایشی ءَ پد کمانڈرترکش نیول فورسز ، وائس ایڈمرل عدنان اوزبل ءَ پاک بحریہ ءِ سروک ءَ گوں گندءُ نند کتگءُ دونیمگی ھدوکی ءِ کسبی کارانی ءُ دونیمگی بحری مشق آنی برجمی ءِ سرءَ گپءُ تران کتگ۔ پاک بحریہ ءِ سروک ایڈمرل ظفر محمود عباسی ءَ ناشرکاری ءِ ھلاپ ءَ جنگ ءَ پاکستانءِ جزم ءُ کرد ھاس میری ٹائم ناشرکاری، آ زری ڈُنگانی ھلاس کنگءِ ھاترءَ یکجائی میاں اوستمانی ٹاسک فورس ءِ تہا پاک بحریہ ءِ ھواری ءِ سرءَ چمشانک داتگ۔ وائس ایڈمرل عدنان اوزبل ءَ خطہءِ تہا امنءُ ایمنی ءُ مھکمی جوڈ کنگءِ ھوالگءَ پاک بحریہ ءِ کردءَ ر ا ساڑاتگ۔ گندءُ نند ءِ تہا ترکش کمانڈر ءَ ر ا دمگی جیڑھ آنی سرءَ پاک بحریہ ءِ نقطہ نظر ءُ بحرِ ہند ءِ تہا امنءُ ایمنی ءُ مھکمی ءِ ھوالگءَ پاک بحریہ ءِ کردءُ کوشستانی سرءَ شونشت داتگ۔ اے مراگشءِ تہا پاکستانءِ صدر ممنون حسین ءَ وائس ایڈ مرل عدنان اُزبال ءَ را پاکستانءِ مزنیں عسکری داد نشان امتیاز ( ملٹری ) داتگ۔ کمانڈر ترکش نیول فورسز ءِ ترءُ تاب ءِ تہا ترکش نیوی ءِ فریگیٹ گراب گیلی بولو(GELIBOLU)ھم کراچی ءِ ترءُ تاب کنت کہ 7تاں 9اپریل ءَ شمالی بحیرہ عرب ءَ بوھوکیں اولی پاک ۔ترک دونیمگی بحری مشق ءِ تہا ھوار بیت۔ کمانڈر ترکش نیول فورسز ءِ سروک ءِ اے ترءُ تاب دوھیں ملک آنی بحری فوج ءِ نیامءَ دونیمگی سیادی ءِ تہا گیش مھکمی ءِ سوب بیت۔
