ہلمند اٹی سرکاری فورس و طالبان تا نیام اٹ جھیڑہ غاتیٹی کم از کم 24طالبان تپاخت، زابل اٹی دھماکہ ٹی اِرا چناتپاخت

کابل۔ 22دسمبر (اے پی پی) اوغانستان نا سویلی صوبہ ہلمند اٹی سرکاری فورس و طالبان تا نیام اٹ جھیڑہ غاتیٹی کم از کم 24طالبان تپاخت و چندیک ٹھپی مسنو۔ کابل اٹی اوغان باسک پارلیمان نا ملکیتی گیسٹ ہاﺅس آ مربوط جلہو اٹی 5بندغ نا کہینگ ئِ پک کننگانے، صوبہ زابل اٹی اسہ دھماکہ اسے ٹی اِرا چناتپاخت و زالبول اسے تون اوار مسہ بندغ ٹھپی مسنو۔ اوغان میڈیا نا رداٹ کمامدار آک پاریر کہ ہلمند نا دارالحکومت لشکرگاہ و ایب و کیب علاقہ غاتیٹی سرکاری فورس و طالبان تا نیام اٹ جھیڑہ غاتیٹی کم از کم 24طالبان تپاخت و چندیک ٹھپی مسنو۔ طالبانک داجنگ اٹی سرکاری فورس آتے بھلو نسخان اس رسیفنگ نا داوا کرینو۔ ہلمند ئِ طالبان تا سوگو گڑھ تکنگک و ماضی خڑک اٹی نیٹو ٹی اوار برطانیہ نا فوج ئِ داڑے بھلو نسخان اسے تون مون تروئی تماسس۔ دارالحکومت کابل اٹی اوغان باسک پارلیمان نا ملکیتی گیسٹ ہاﺅس آ مربوط جلہو اٹی 5بندغ نا کہینگ ئِ پک کننگانے۔ کابل پولیس نارداٹ کابل نا ضلع پانچ انا علاقہ ٹی اولسی جرگہ نا باسک میر ولی نا گیسٹ ہاﺅس آ عسکریت پسند آک مربوط جلہو کریر و فورس آتا کارروائی ٹی ہڑتوم آ جلہو گیر آتے تپاخت کننگا۔ کمامدارآتارداٹ داواقعہ ٹی کم از کم پنچ بندغ تپاخت کریر۔ صوبہ زابل اٹی اسہ دھماکہ اسے ٹی اِرا چنا تپاخت و زالبول اسے تون اوار مسہ بندغ ٹھپی مسر۔ کمامدارآتارداٹ دھماکہ شار صفاءنا علاقہ ٹی مس۔