اسلام آباد۔30مارچ(اے پی پی) مزن وزیر شاہد خاقان عباسی ءَ نودربرانی سرءَ زور پِر داتگ کہ آ ملکءِ سماجی ءُ اقتصادی دیمروئی ءِ تہا وتی کردءَ پیلو کنگءِ ھاترءَ بازیں تعلیمی پڑآنی تہا دیم ءَ رؤگ ءِ ھاترءَ محنت بہ کن اَنتءُ میاں اوستمانی تکءَ ملک ءِ شرپ ءُ عزت ءَ بُرز بہ کن اَنت۔ آئیءَ اے گپ روٹس ائیوی انٹرنیشنل وانگ جاھءِ نودربراں گوں گپءُ تران کنانءَ کتگ کہ آھاں جمعہ ءِ روچءَ مزن وزیر کارگسءِ ترءُ تاب کتگ۔ اے گندءُ نند بازیں سرکاری ءُ نجی تعلیمی ادارگانی نودربراں مزن وزیر کارگس ءَ لوٹگءُ ملک ءِ تہا مزن تریں کارگسءِ کارانی ھوالگءَ سرپد کنگءِ گامگیج ءِ بھر اِنت۔ اے نودربرانی تہا یک انٹر نیشنل ٹینس چیمپیئن ، سکریبل چیمپیئنءُ آپ ءِ رکھینگ ءِ منصوبہ ’’ بوند شمس ‘‘ ءِ انچارج ھم ھوار بوتگ اَنت۔ مزن وزیر ءَ نودربرانی ھاترءَ نیکیں واھشتانی درشانی کتگءُ امریکہ ءَ وتی تعلیمی تجروبتءَ چہ آئیءَ را سرپد کتگ۔ راجی اسمبلی ءِ باسک شزا فاطمہ خواجہ ھم اے موھءِ سرءَ ساڑی بوتگ ءُ آئیءَ نودربرانی نیمگءَ چہ جست کتگیں جستانی پسو ھم داتگ کہ مزن گسءُ راجی تشکیل ءِ تہا ورناھ آنی کردءِ ھوالگءَ بوتگ اَنت۔
