اسلام آباد۔ 21دسمبر (اے پی پی) گچین کاری کانود 2017 ءنا مسودہ ٹی سینیٹ نا گچین کاری تیٹی اومیت دار کن خڑچ آتا حد 15لکھ و قومی اسمبلی کن 40لکھ روپئی مقرر کننگ نا سلاہ تننگانے۔ گچین کاری اصلاحات کمیٹی نا کنڈآن پیش کروک آ ارٹ میکو عبوری رپورٹ نا رداٹ اسمبلی نا عمومی نشست آ گچین کاری تیٹی بشخ ہلوک آ اومیت دار کن الم مریک کہ او شیڈولڈ بینک اٹی داخاص مسخت کن تینا مخصوص اکاﺅنٹ اس کے ہرانا کمک اٹ غٹ گچین کاری خڑچ آتے کننگے وخت اس کہ اومیت دار نا کنڈآن دااکاﺅنٹ اٹی اونا خڑچ آتا حد انا بریبر زر جمع کرفنگ نا سلاہ تننگانے۔ ذرائع نا رداٹ سینیٹ نا نشست آ بشخ ہلوک آ اومیت دار کن گچین کاری خڑچ آتا حد 15لکھ، قومی اسمبلی نا نشست آ 40لکھ وخت اس کہ صوبائی اسمبلی نا نشست آ گچین کاری خڑچ آتا حد 20لکھ روپئی مقرر کننگ نا سلاہ تننگانے۔ اومیت دار آتا کنڈآن گچین کاری نا 30دے انا تہٹی تینا خڑچ آتا سرجم آتے جمع کرفنگ المی مریک۔ داڑتون اوار اوار اومیت دار ئِ ریٹرننگ آفیسر ئِ سرجم آتون بل و رسید وخت اس کہ بینک سٹیٹمنٹ ہم جمع کرفنگ المی مریک۔
