اسلام آباد۔ 21دسمبر (اے پی پی) پاک چین اقتصادی راہداری ڈٹ آن پاکستان و چین نا نیام اٹ نہ صرف جغرافیائی خڑکی ودک بلکن تین پہ تینی رابطہ غاتے سوگو جوڑ کرسا شونداری نا بے پناہ وارخواہی ہم مون آ بریک ، گوادر نا بندرگاہ نا کمک اٹ چینی مصنوعات آتا جہانی منڈی تسکان رسینگ نا تغ حقیقت اٹ بدل مننگ ئِ۔ چارشنبے آ پلاننگ کمیشن نا کمامدارآک اے پی پی ئِ پاریر کہ پاک چین اقتصادی راہداری ڈٹ انارداٹ ملک انا مواصلات آتا بشخ اٹی بھلو زرکاری اس کننگ انگ ئِ، ملک اٹی 12ہزار کلومیٹر مریس روڈآتا بنداوی ڈھانچہ پورو کننگانے وخت اس کہ دابشخ اٹی 33ارب ڈالر نا پین زرکاری نا گنجائش ئِ۔ گدرینگوک آاِرا سال اٹی روڈ آتا بنداوی ڈھانچہ نا جوڑ جاڑ و شونداری کن 9.5ارب ڈالر نا ڈٹ آتیا کاریم برجائِ ہرا بروک آ مسہ سال اسکان پورو کننگک۔ داڈٹ انا رداٹ مسہ سال انا وخت 1300 کلومیٹر مریس موٹروے جوڑجاڑکننگ انگ ئِ۔ اوفک پاریر کہ این 85شاہراہ گوادر بندرگاہ ئِ سوراب۔کوئٹہ نا خڑک نیشنل ہائی وے نیٹ ورک این 25و ملک انا ایلو بشخ آتون ملفنگ نا کاریم پورو مس ہرانا باضابطہ افتتاح ئِ وزیراعظم محمد نواز شریف کرینے، داڈٹ اوغانستان و نیامی ایشیانا ایلو ملک آتے کن گوادر اسکان رسینگ نا گونڈ انگا کسرمریک۔ اوپاریر کہ پاکستان سویلی ایشیا نا ملک آتا رابطہ غاتا سوگوی کن کاریم کننگ ئِ وخت اس کہ سی پیک نا رداٹ بلوچستان آخصوصی توجوہ تننگ انگئِ و اودے ملک انا ایلو بشخ آتون ملفنگ کن کاریم کننگ انگ ئِ ہراڑآن ملک اٹی شونداری و شونہالی نا پوسکن آکسرآک ملنگرہ۔ اوپاریر کہ روڈو موٹروے تا ساڑی نیٹ ورک نا گچینی کن کاریم کننگ انگ ئِ و دابابت مچ آ ملک اٹی بریبری نا بنداو آ کاریم کننگ انگ ئِ، ساڑی ہی ٹی وزیراعظم محمد نواز شریف سیالکوٹ آن لاہور موٹروے نا افتتاح ئِ کرے وخت اس کہ ملتان، مظفرگڑھ، ڈیرہ غازی خان نا ڈٹ ہم بناءکننگ انگ ئِ۔ ملک اٹی روڈآتاانفراسٹرکچر نا شونداری و گچینی آن ملک انا جم اٹنگا قومی پیداوار اٹی اسٹ آن 1.5درسد نا ودکی مریک وخت اس کہ ملک اٹی ہندی و درملکی زرکاری ئِ ہم مون آ دننگ دوئی مریک۔ اوپاریر کہ سی پیک نا رداٹ گوادر نا بندرگاہ ئِ ملک انا غٹ شارآتون روڈاتون گنڈنگ انگ ئِ و داوخت ملک اٹی موٹروے نا 13ڈٹ آتیا کاریم کننگ انگ ئِ۔
