اقتصادی راہداری ڈٹ انا برخلاف ہر سازش ئِ بے سہب جوڑ کننگک، باسک صوبا ئی اسمبلی حاجی میر غلام دستگیر بادینی

کوئٹہ۔ 21دسمبر (اے پی پی) پاکستان مسلم لیگ (ن) نا سینئر راہشون و باسک صوبائی اسمبلی حاجی میر غلام دستگیر بادینی پارینے کہ وزیراعظم محمد نواز شریف ملک ئِ دُوارہ ایشیانا ٹائیگر جوڑ کرینے مسلم لیگ (ن) ہراتم اقتدار ئِ سنبھالاتو ملک تہاری تیٹی تموک ئس ولدا مچ آملک اٹی میگاپروجیکٹ آتے بنا ئِ کرے ، دہشت گردی نا برخلاف جنگ اٹی مچ آ قوم فوج اتون ہم کوپہ سلوک ئِ ، امن نا اڈتننگ و دہشت گردی نا چٹفنگ کن پاک فوج انا ورناک بے شمار قربانی تسنو۔ پاک چین اقتصادی راہداری آن معاشی، اقتصادی و واپاری شونداری نا پوسکن آ کسرآک ملنگ انگ ئُ، مچ آ ملک خاص کر بلوچستان نا الس اسکان راہداری نا بھرم آک سرمریرہ۔ داخیال آتا درشانی ئِ او”اے پی پی“ تون ہیت وگپ کرسا کرے۔ اوپارے کہ راہداری نا پوروی اٹی مون اٹ بروک آ اڑاند آتے ہلنگ پننگک و داڈٹ انا برخلاف ہرسازش ئِ بے سہب جوڑ کننگک، باسک صوبائی اسمبلی پارے کہ پاکستان نا معاشی و اقتصادی شونداری ٹی پاک چائنہ اقتصادی راہداری شونداری نا ہموزینہ ئِ ہرانا بدولت پاکستان نا نزورمعاشی حالیت آتیٹی اسہ ہندن ئُ ترند رفتار مثبت تبدیلی اسے نا بناءمننگ والا ئِ ہراڑآن وطن عزیز اٹی معاشی شونداری نا پہیہ ترند رفتاری اٹ چلینگک و اقتصادی حالیت آتا بدلی نا اثر براہ راست لس بندغ نا زند آ ہم خوشگوار تبدیلی نا حقی موجب جوڑ مریک۔ اوپارے کہ پاک چین اقتصادی راہداری ڈٹ انا بنجائی شار گوادر نا الس ئِ تعلیم ، جان جوڑی ، روزگار و واپار نا وارخواہی فراوان کننگ کن بنجائی حکومت نا کمک اٹ کیہی ڈٹ آتیا کاریم ترندی اٹ جاری ئِ ، اوپارے کہ وزیراعلیٰ بلوچستان نواب ثناءاللہ خان زہری نا سروکی ٹی اڈ ہلوک مخلوط صوبائی حکومت پاک چین اقتصادی راہداری ڈٹ اٹی تینا کلیدی کڑد ئِ ادا کننگ ئِ و سی پیک ڈٹ انا بنداو گوادر نا الس ئِ تعلیم ، جان جوڑی ، روزگار و واپار نا وارخواہی فراوان کننگ کن بنجائی حکومت نا کمک اٹ کیہی ڈٹ آتیا کاریم ترندی اٹ برجائِ۔