اسلام آباد۔ 20 دسمبر (اے پی پی) صدر مملکت ممنون حسین پارینے کہ قائد اعظم نا زند ننے فکرو عمل نا یکجائی نا کلہو ئِ ایتک و عزت نفس و نظریاتی اساس آ ثابت گامی آ سلنگ آن اودے تینا ہم عصرہ غاتیٹی ممتاز جوڑ کرینے۔ قائد اعظم نا دا افکار نا ننے اینو ہم ہنداخہ گرج ئِ اخس کہ پاکستان نا جوڑ مننگ نا وخت ئس، روشنا آخبت پاکستان نا درگہ غا دستک تننگ ئِ، قوم انا ہر بندغ خاص کر ورناک ہر وڑنا مصلحت و شکوک و شبہات آتے اسہ پلو تخسا سرگرم عمل مریر تانکہ پاک چین اقتصادی راہداری تون اوار ایلو غٹ ڈول نا وارخواہی تیان پبی فائدہ ہرفنگ مرے۔ داہیتئِ او سے شنبے آ ایوان صدر اٹی ہائر ایجوکیشن نا کنڈآن ”یوم قائد“ نا چرجوئی ٹی اڈ ہلوک آ دود آن تران کرسا پارے۔ دود اٹی وزیر مملکت تعلیم وکسبی تربیت انجینئر محمد بلیغ الرحمان ، چیئرمین ہائر ایجوکیشن کمیشن ڈاکٹر مختار احمد ، بنجائی وزیر آک ، جتا یونیورسٹی تا وائس چانسلر ، طالب علم و ایلو شرفمند آمہمان تا بھلو کچ اس ساڑی ئسر۔ صدر مملکت پارے کہ اسہ مرغن ئُ سفر اسے آن گڈ پاکستان نا درگہ غا روشنا آخبت دستک تننگ ئِ ہراڑآن فائدہ ہرفنگ کن المی ئِ کہ ہروڑنا مصلحت و شک و شبہات آتے اسہ پلو تخسا قوم انا ہربندغ ، خاص وڑاٹ ورناک سرگرم عمل مریر تانکہ پاک چین اقتصادی راہداری تون اوار ایلو غٹ وڑنا وارخواہی تیان پبی فائدہ ہرفنگ مرے۔ صدر مملکت پارے کہ حالیت آک چائے امر کہ مریر ، ننے ویل آتا گیشتری آن گھبرائفسا وخت اس ہم تینا کسر ئِ بایدے بدلیفپن بلکن اواری اتون تینا مزل نا کنڈا روان مرین۔ صدر مملکت پارے کہ سیاسی قائد اسے نا کڑد انا غٹ آن بھلا خوبی دادے کہ او امانت نا رکھ ئِ کرسا تینے آ کروک آ پت آ ہردروشم اٹ پورو سلے۔ قائداعظم نا ہندا خوبی ئس ہرانا سوب اونا مخالف آک ہم امنا کننگ آ بیوس ئسر کہ او ہمیشہ درست ہیت ئِ پائک و بھلن آن بھلا فائدہ کن ہم اصول آتیا وخت اس ہم سمجھوتہ کتوکہ۔ داوخت آ وزیر مملکت تعلیم و کسبی تربیت انجینئر محمد بلیغ الرحمان و چیئرمین ہائر ایجوکیشن کمیشن ڈاکٹر مختار احمد تینا تران اٹی بابائے قوم قائد اعظم نا زند، شخصیت و خذمت آتے تالان کرے۔
