اسلام آباد۔ 20 دسمبر (اے پی پی) سینیٹ ئِ پاننگانے کہ قومی شناختی کارڈ آتا پک کننگ نا مہم نا وخت 58 ہزار آن زیات جعلی شناختی کارڈ آتا ڈس و نشان ئِ خلنگانے، جعلی شناختی کارڈ جوڑ کننگ اٹی نادرا نا 54ملازم اوار خننگار، 16برطرف مسنو، 2244بندغ آک تینٹ تینا درملکی شہریت آتا بارواٹی معلومدار کریر۔ سے شنبے آ ایوان بالا ٹی وقفہ سوج آتا وخت سینیٹر احمد حسن، ڈاکٹر جہانزیب جمالدینی نا سوج آتا ورندی ٹی وزیر مملکت داخلہ انجینئر بلیغ الرحمان ایوان ئِ پارے کہ شناختی کارڈ آتا پک کننگ نا مہم نا وخت 58ہزار آن زیات جعلی شناختی کارڈآتا ڈس و نشان ئِ خلنگانے۔ 94لکھ آن زیات بندغ ئِ دا بابت معلومدار دوئی کننگ کن ایس ایم ایس گدریفنگا۔ اوپارے کہ جعلی شناختی کارڈ جوڑ کننگ اٹی نادرا نا 54ملازم اوار خننگار ہرافتیان 16ئِ برطرف کننگانے۔ اوار ملازم آتا کیس آک کارروائی کن ایف آئی اے ئِ گدریفنگانو۔ اوپارے کہ خیبر پختونخوا ٹی 9330، فاٹا ٹی 2820، پنجاب اٹی 15ہزار آن زیات، بلوچستان اٹی ہشت آن زیات، اسلام آباد اٹی 900 آن زیات ، گلگت بلتستان اٹی 27و آزاد جموں و کشمیر اٹی 795جعلی شناختی کارڈ آتا معلوم مس۔ اوپارے کہ 2244بندغ تینٹ معلومدار کریر کہ او پاکستان نا شاری افس۔ اوفتیٹی اوغانستان ، بنگلہ دیش وبھارت نا شاری ہم اوار ئُ۔
