وزیر مملکت داخلہ بلیغ الرحمان نا ایوان بالا ٹی وقفہ سوج آتا وخت ورندی
اسلام آباد۔ 20 دسمبر (اے پی پی) وزیر مملکت داخلہ بلیغ الرحمان پارینے کہ انسانی سمگلنگ نا توننگ کن اسہ باقاعدہ مہم اس جاری ئِ، گدرینگوک آ اسہ سال آن ہم کم وخت اٹی 2184انسانی سمگلر آتے دزگیر کننگانے۔ سے شنبے آ ایوان بالا ٹی وقفہ سوج آتا وخت سینیٹر اعظم سواتی ، طلحہ محمود، سردار اعظم موسیٰ خیل نا سوج آتا ورندی ٹی وزیر مملکت داخلہ ایوان ئِ پارے کہ ایف آئی اے کانودی اتھارٹی و پورو آجوئی نا رداٹ کاریم کننگ ئِ۔ اونا کارکڑد اٹی نمان گچینی اس بسنے۔ ای او بی آئی کیس اتون اوار چندی کیس آک اونا مثال ئُ۔ ایف آئی اے نا ڈائریکٹر جنرل نا عہدہ نا رکھ انا بابت وزارت داخلہ نا مون آ ہچ ئُ معاملہ سے ہرفنگ تنے۔ اوپارے کہ ایف آئی اے آن کروک آ جاست وپاست، انسانی سمگلنگ نا توننگ کن اسہ باقاعدہ مہم اسے نا بناءکننگانے۔ 18 نومبر 2015ءآن 18 اگست 2016ءاسکان 2148بندغ ئِ دزگیر کننگانے۔ 1443ہند آتیا چھاپہ خلنگانے۔ انسانی سمگلنگ نا توننگ کن غٹ تر گام گیج کننگک۔ اوپارے کہ ایف آئی اے نا امیگریشن نا بابت کانود نا دنگ طورخم بارڈر اسکان ودفنگانے تانکہ غیر کانودی انسانی سمگلنگ ئِ توننگے۔
