اسلام آباد۔ 20 دسمبر (اے پی پی) بنجائی وزیر ریلوے خواجہ سعد رفیق پارینے کہ ساڑی حکومت نا دور اٹی ریلوے نا نسخان اٹی نمان کمتی بسنے، بروک آ اِرا مسہ سال اٹی نسخان پین کم مریک، ریلوے نا کارکڑد ئِ گچین جوڑ کننگ اُن، جیکب آباد۔ سبی، کوئٹہ ریلوے لین ئِ اپ گریڈ کننگک، کوئٹہ تفتان ریلوے لین کن ارب آ ڈالر درکار مریک ، ایم ایل ون ، ایم ایل ٹو و ایم ایل تھری پروجیکٹ اولیتی بنداو تیا پورو مریرہ۔ سے شنبے آ ایوان بالا ٹی وقفہ سوج آتا وخت سینیٹر طلحہ محمود، سردار اعظم موسیٰ خیل، ڈاکٹر جہانزیب جمالدینی نا سوج آتا ورندی ٹی بنجائی وزیر ریلوے خواجہ سعد رفیق ایوان ئِ پارے کہ 2015-16 ءٹی پاکستان ریلوے نا نسخان 26ارب 99 کروڑ 30 لکھ روپئی سلیس۔ 2013-14ءٹی دانسخان 32ارب 52کروڑ 70لکھ روپئی ئس۔ اوپارے کہ مال برداری ٹی گدرینگوک آ مسہ نیم سال اٹی نمان ودکی مسنے۔ پنشن و تنخواہ تیٹی ودیکی آن مالی بھاریم ودانے۔ اوپارے کہ بروک آ اِرا مسہ سال اٹی نسخان اٹی پین کمتی بریک۔ نن خدو40 کروڑ روپئی ملازم آتیٹی بشخ وپانٹ کننگانے۔ اسہ باقاعدہ ڈٹ بندی سے نا رداٹ ریلوے نا کارکڑد ئِ گچین جوڑ کننگ انگ ئِ۔ 2015-16ءٹی ریلوے نا کٹیا 36ارب60 کروڑ روپئی اسکان رسینگا ہراکہ 2014-15ءٹی 31ارب90 کروڑ روپئی ئس۔ اوپارے کہ سی پیک نا رداٹ بنجائی کوریڈور ایم ایل نا ساڑی ٹریک ئِ گچین جوڑ کننگ انگ ئِ۔ آخبت اٹی باربرداری نا ہن و بر کن پوسکن آ کسرتا پٹنگ نا غرض اٹ فریٹ ٹرانسپورٹ کمپنی اس اڈتننگانے۔ اوپارے کہ جیکب آباد، سبی ، کوئٹہ ریلوے لین ئِ اپ گریڈ کننگک۔ کوئٹہ ژوب ئِ کوٹلہ جام ڈیرہ اسماعیل خان تون ملفنگک۔ اونا فزیبلٹی تیار کننگ انگ ئِ۔ اول ایم ایل ٹو و ولدا ایم ایل تھری جوڑ کننگک۔ گوادر بسیمہ لین کن ڈغار نا دوئی نا کاریم نا بناکننگانے۔ نن گوادر شار اٹی ریلوے اسٹیشن و تنصیب آتے کن 60 آن 70 درسد جاگہ دوئی کرینن۔ اوپارے کہ سبی ہرنائی ریلوے ٹریک آ 45درسد کاریم پورو مسنے۔ کوئٹہ تفتان ریلوے لین کن ارب ڈالر درکار مریک۔ ننا اولین اولیت ایم ایل ون ، ایم ایل ٹو و ایم ایل تھری ئِ۔
