سراجیوو۔ 20 دسمبر (اے پی پی) وزیراعظم محمد نواز شریف سے شنبے آ بوسنیا نا مسہ دے ئی سرکاری دورہ غا سرمس۔ بوسنیا نا وزیر ٹرانسپورٹ ازمیر جیسکو و ایلو بڑزکو کمامدارآک بوسنیا ئی دارالحکومت اٹی وزیراعظم و اونا ڈل انا انٹرنیشنل آ جم و جوش اٹ خیرمقدم ئِ کریر۔ داوخت آ بوسنیا ٹی پاکستان نا سفیر لیفٹیننٹ جنرل (ر) سلیم نواز و بوسنیائی سفیر ندیم مکارروک ہم ساڑی ئسر ۔ وزیراعظم ہندن کہ جہازآک دڑنگا تو اودے گارڈ آف آنر پیش کننگا۔ روایتی لویس اٹی ملبوس چناک وزیراعظم ئِ پھل آتا دستہ اس تسر۔ وزیراعظم 20 آن 22 دسمبر اسکان بوسنیا نا وزراءکونسل نا چیئرمین (وزیراعظم )ڈاکٹر ڈینس زیودے وچ نا سلہ غا دادورہ ئِ کننگ ئِ۔ بیگم کلثوم نواز و وزیراعظم نا خصوصی کمکار و خارجہ امور طارق فاطمی ہم وزیراعظم تون اوار ئُ۔ دورہ ٹی وزیراعظم محمد نواز شریف تینا ہم منصب تون ون آن ون اوڑدہی کیک ہراٹی تین پہ تینی است خواہی نا ہڑتوم آ کنڈآتا علاقائی وجہانی معاملہ غاتیا خیال آتادرشانی مریک۔ ہڑتوم آ کنڈآک ڈل آتا کہول آ ہم مذاکرات کیرہ۔ ہڑتوم آ ملک آک سیاسی ، واپاری و اقتصادی تعلقداری رابطہ ، بین الپارلیمانی رابطہ و دودوربیدہ و تعلیمی رابطہ غاتا مون آ دننگ آ خصوصی توجوہ تخسا گیشتر تین پہ تینی تعلقداری تا جاچ ئِ ہلیرہ۔ وزیراعظم نواز شریف بوسنیا نا پریذیڈنسی نا باسک آتیان بیدس پارلیمانی اسمبلی نا ایوان زیریں و ایوان بالا نا راہشون و باسک آتون ہم ملک۔ او رئیس العلماءحسین ایف کوازویک تون ہم ملک۔ وزیراعظم بوسنیا ہرزیگووینا نا بزنس فورم آن تران کیک و فارن ٹریڈ چیمبر اینڈ فارن انویسٹمنٹ پروموشن ایجنسی نا باسک آتون ہم ملک۔
