اسلام آباد۔ 20 دسمبر (اے پی پی) مسکوہی سفیر راس مسعود حسین پارینے کہ وزیراعظم محمد نواز شریف نا دورہ بوسنیا تون واپاری و معاشی تعلقداری تیٹی گچینی بریک۔ احوالکار آتون ہیت وگپ کرسا اوپارے کہ یوگو سلاویہ نا بشخ و پانٹ نا معرض وجود اٹی بروک آ بوسنیا یورپ نا اسٹ انگا مسلم ملک ئِ ہراڑے مسلمان تا گیشتری ئِ و بشخ وپانٹ نا وخت سربیا دا مسلمان تیا بے کچ بیدادی کرے ، داوخت پاکستان نا حکومت و الس اوفتا بھاز کمک ئِ کریر ولے داکان پد بوسنیا تون تعلقداری تے مون آ دننگ متو۔ مسکوہی سفیر پارے کہ وزیراعظم محمد نواز شریف نا کنڈآن بوسنیا نا دا اولیکو دورہ ئِ و داڑآن ہڑتوم آ ملک آتا نیام اٹ ہڑتوم آ کنڈآتا تین پہ تینی تعلقداری تتون اوار واپاری ، اقتصادی ، دودوربیدہ ہی و تعلیمی رابطہ غاتے مون آ دننگک۔ اوپاک چین اقتصادی راہداری ڈٹ انا بابت ہیت وگپ کرسا پارے کہ بوسنیا نا سیم ترکی و مراکوتون ملک و اونا کسر افریقی ملک آتسکان رسینگ ہم آسان مریک۔ داوخت آ پاکستان اکنامک فورم نا چیئرمین ہمایوں اقبال شامی پارے کہ داکان مست ننا بوسنیا تون واپاری و اقتصادی تعلقداریک بھاز محدود ئسر و وزیراعظم پاکستان نا دورہ بوسنیا آن ہڑتوم آ ملک آتا تعلقداری تیٹی پین گچینی بریک۔ اوپارے کہ بوسنیا جوڑ جاڑنا بابت گچین شہریت تخک و پاک چین اقتصادی راہداری ڈٹ انا پوروی ٹی نن اونا لائخی تیان ہم فائدہ دوئی کننگ کینہ۔
