اسلام آباد۔ 20 دسمبر (اے پی پی) وزیراعظم محمد نواز شریف سے شنبے آ مسہ دے ئی دورہ غا بوسنیا غا رادہ مس، او 20 آن 22دسمبر اسکان بوسنیا نا وزراءکونسل نا چیئرمین (وزیراعظم) ڈاکٹر ڈینس زیویدوک نا سلہ غا دا دورہ ئِ کننگ ئِ، بیگم کلثوم نواز و وزیراعظم نا خصوصی کمکار خارجہ امور طارق فاطمی ہم وزیراعظم تون اوار ئُ۔ دورہ نا وخت آ وزیراعظم محمد نواز شریف تینا ہم منصب تون ون آن ون اوڑدہی کیک ہراٹی تین پہ تینی است خواہی نا ہڑتوم آ کنڈآتا ، علاقائی و جہانی معاملہ غاتیا درشانِ خیال مریک۔ دفترخارجہ نا کنڈآن جاری بیان نا رداٹ طرفین ڈل آتا کہول آ ہم مذاکرات کیرہ۔ ہڑتوم آ ملک آک سیاسی، واپاری و اقتصادی تعلقداری رابطہ ، بین الپارلیمانی رابطہ و دودوربیدہ ہی تعلیمی رابطہ غاتامون آ دننگ آ خصوصی توجوہ تخسا و گیشتر تین پہ تینی تعلقداری تا جاچ ئِ ہلیرہ۔ وزیراعظم محمد نواز شریف بوسنیا نا پریذیڈینسی نا باسک آتیان بیدس پارلیمانی اسمبلی نا ایوان زیریں و ایوان بالا نا راہشون و باسک آتون ہم اوڑدہی کیک۔ وزیراعظم بوسنیا ہرزیگووینا نا بزنس فورم آن تران کیک و فارن ٹریڈ چیمبر اینڈ فارن انویسٹمنٹ پروموشن ایجنسی نا باسک آتون ہم ملک۔
