اسلام آباد۔ 19 دسمبر (اے پی پی) مسکوہی سفیر ایازوزیر نا پاننگ ئِ کہ پاک چین اقتصادی راہداری ڈٹ اٹی روس انا است خواہی آن ڈٹ انا اہمیت پین ہم ودک۔ احوالکار آتون ہیت وگپ کرسا اوپارے کہ پاکستان ڈیہہ نا اہم ئُ ملک اسے و پاک چین اقتصادی راہداری ڈٹ آن مچ آ دنیا نا اسہ ایلو تون رابطہ پین سوگو مریک و داڈٹ آن مچ آ دنیا ٹی معاشی، راجی و واپاری تعلقداری تے پین سوگوی رسینگک۔ روس انا سفیر نا بیان نا ذکر ئِ کرسا اوپارے کہ روس انا کنڈآن پاک چین اقتصادی راہداری ڈٹ ئِ اہمیت تننگ و دا ڈٹ اٹی است خواہی ہلنگ آن دا ڈٹ انا اہمیت پین ہم ودک۔ اوغانستان اٹی امن نا اڈتننگ نا بابت سوج انا ورندی ئِ ترسا اوپارے کہ اوغانستان اٹی امن نا اڈتننگ نا بابت پاکستان آنبار روس ہم ہنداخہ اہمیت تخک انتئے کہ روس اوغانستان نا تہہ نا معاملہ غاتیان جوانی اٹ واقف ئِ۔ مسکوہی سفیر پارے کہ ماضی و حال انا روس اٹی بھاز پرخ ارے و پاک چین تعلقداری تے سوگو خنسا روس ہم پاکستان تون تعلقداری استوار کننگ نا بنائِ کرینے ہراڑآن ڈیہہ ٹی سوگوی نظر بننگ ئِ۔ اوپارے کہ روس ، چین، اوغانستان و پاکستان اواری اٹ تولر تو اوغانستان اٹی ہم امن اڈ ہلنگ کیک۔ ایاز وزیر مستی پارے کہ روس عندیہ تسنے کہ او اوغانستان اٹی امن عمل کن چین، پاکستان و اوغانستان نا نیام اٹ ہیت وگپ اٹی میزبانی کننگ کن ہم تیار ئِ۔ اوپارے کہ اگہ روس ، چین ، پاکستان و اوغانستان ملر تو اوغانستان اٹی قیام امن ممکن ئِ۔
