وزارت جان جوڑی نا قومی اسمبلی ٹی ورندی
اسلام آباد۔ 16دسمبر (اے پی پی) وزارت جان جوڑی نا کنڈآن قومی اسمبلی ئِ پاننگانے کہ حکومت مچ آ ملک اٹی ٹی بی نا سدباب کن گلوبل فنڈ گرانٹ نا کمک اٹ گام گیج کننگ ئِ، ہژدہ میکو ترمیم آن گڈ جان جوڑی نا بشخ صوبہ غاتا حوالہ ئِ ، ہراڑے ہراڑے ہسپتال ارے اوفتا گچینی کن صوبہ غاتے بایدے گام گیج کروئی مرے۔ جمعہ آ قومی اسمبلی نا دیوان اٹی وقفہ سوج آتا وخت نعیمہ کشور خان نا سوج انا ورندی ٹی پارلیمانی سیکرٹری جان جوڑی ڈاکٹر درشن پارے کہ مچ آ ملک اٹی 2015ءٹی جم وڑاٹ مسہ لکھ 23ہزار 267و جون 2016ءاسکان اسہ لکھ 87ہزار 741مریض مون آ بسر۔ اوپارے کہ حکومت گلوبل فنڈ گرانٹ نا کمک اٹ صوبہ غاتے ٹی بی نا مرض انا سدباب کن امداد تننگ ئِ۔ خالدہ منصور نا سوج اناورندی ٹی او پارے کہ جان جوڑی نا آسراتی کن دُوانزدہ پوسکن ئُ ہسپتال جوڑ جاڑ کننگ انگ ئِ۔ اسہ پین سوج اسے نا ورندی ٹی ڈاکٹر درشن پارے کہ ہژدہ میکو ترمیم آن گڈ جان جوڑی نا بشخ صوبہ غاتون ہنانے۔ اوپارے کہ ہراڑے ہراڑے مست آن ہسپتال ارے اوفتا حالیت آتا گچینی کن صوبہ غاتے تینا کڑد ئِ ادا کروئی مرے۔ شیر اکبر خان نا ضمنی سوج انا ورندی ٹی پارلیمانی سیکرٹری ڈاکٹر درشن پارے کہ وزیراعظم صوبہ غاتے پت اٹی ہلسا ہسپتال جوڑ کننگ نا فیصلہ کرینے ہراڑے ہراڑے صوبہ غاک پارہ ہموڑے ہسپتال اڈتننگک۔
