پاکستان تینا بقاءنا جنگ اٹی بے مثل قربانی ترسا دہشت گردی نا مخ ئِ پرغا
سانحہ ٹی شہید و زہمی مروک آ طالب علم آتا خاہوت آتون دلی ہمدردی نا درشانی ئِ کرے
اسلام آباد۔ 16دسمبر (اے پی پی) وزیراعظم محمد نواز شریف دہشت گردی نا برخلاف جنگ ئِ ایسری انجام اسکان سرکننگ و بروک آ نسل آتے کن پرامن و سوگو پاکستان ئِ باوری جوڑ کننگ نا عزم انا درشانی ئِ کرینے۔ پشاور اٹی آرمی پبلک اسکول آ جلہو نا ارٹ میکو برسی نا وخت آجمعہ آ قوم انا پن کلہو اٹی وزیراعظم پارے کہ آرمی پبلک اسکول نا سانحہ غان گڈ پاکستانی قوم و سروک دہشت گرد آتا برخلاف بے پرخ کارروائی نا صفاو دوٹوک فیصلہ کریر۔ وزیراعظم پارے کہ نن فیصلہ کریسن کہ راج آن دہشت گردی و انتہاپسندی نا چٹفنگ کن پبی کارروائی کننگک و ننا کودک فرشتہ غاتے شہید کروک آتون ہچ ئُ رعایت اس کننگپک۔ وزیراعظم پارے کہ دنیا خناکہ پاکستان دہشت گرد آتا نیٹ ورک ئِ چٹفے و تینا بقاءنا جنگ اٹی بے مثل قربانی ترسا دہشت گردی نا مخ ئِ پرغا، وزیراعظم سانحہ آرمی پبلک اسکول اٹی شہید و زہمی مروک آ طالب علم آتا خاہوت آتون دلی ہمدردی نا درشانی ئِ کرے۔ اوپارے کہ او پدسلوک آ خاہوت آتا ڈکھ اٹی بریبر نا شریک ئِ ۔ مچ آ پاکستانی قوم دا سانحہ نا دڑد ئِ محسوس کیک و پدسلوک آخاہوت آتون تفوک ئُ، اوپارے کہ 16دسمبر ننے دا المناک واقعہ نا یات ترفک ہراٹی طالب علم آتے اوفتا تعلیم نا وخت آ بے دڑدی اٹ شہید کننگا۔او پارے کہ دا ہمو دے ئس ہراتم بے رحم دشمن بربریت نا درشانی ئِ کرے و کودک طالب علم آتے وحشیانہ کارروائی نا نشانہ جوڑ کرے۔ اوپارے کہ نن دا دے انا غم و دڑد ئِ وخت اس ہم است آن دننگ کپنہ۔
