خلقت ہرے کہ خیبرپختونخواٹی ہراپوسکن آ پاکستان جوڑ مننگ ئِ، بلوچستان اٹی مایوسی خوشی ٹی بدلینگانے
نمان کارکڑد والا برآمد کنندگان آتیٹی ایکسپورٹ ایوارڈ بشخ وپانٹ کرے
اسلام آباد۔ 15دسمبر (اے پی پی) وزیراعظم محمد نواز شریف پارینے کہ ساڑی آ حکومت شرح نمو ٹی ودکی آ توجوہ تخانے، صنعتی ، کشاری و ایلو بشخ آتا شونداری کن غٹ تر وسیلہ غاتے کاریم اٹ اتنگک، ملک آن بے روزگاری ، نیزگاری و جہالت نا چٹفنگ نا انحصار ننا شرح نمو آٹی ئِ۔ برآمدات آتیٹی 25آن 30 درسد ودکی نا اومیت تخنہ، روزگار نا پوسکن ئُ وارخواہی ودی کننگ نا حکومتی ایجنڈہ تون اوار اوار الس ئِ جان جوڑی و تعلیم نا گچین آسراتی تا فراوانی ئِ اولیت تسونن۔ دہشت گرد آتا مخ انا ملی پنانے، فتنہ پھسات ئِ لتاڑنگ ننا ایمان نا بشخ اسے، بجلی نا لوڈشیڈنگ ئِ ماس آن چٹفنہ۔ داخیال آتا درشانی ئِ او پنچ شنبے آ بنجاءایوان ہائے صنعت و واپار نا 40می ایکسپورٹ ایوارڈز نا دودآن تران کرسا کرے۔ داوخت آ وزیر خزانہ محمد اسحاق ڈار ، وزیر واپار خرم دستگیر ، بنجاءایوان ہائے صنعت وواپار پاکستان نا صدر عبدالرﺅف عالم، ٹریڈڈویلپمنٹ اتھارٹی آف پاکستان نا چیف ایگزیکٹو آفیسر ایس ایم منیر، پوریاگرراہشون افتخار ملک، محمد ادریس ، زبیر طفیل و خالد تواب آن بیدس وزیر آک، پارلیمنٹ نا باسک آک، بڑزکو کمامدار و پوریاگر و صنعت کار آتا نمائندہ غاک ہم ساڑی ئسر۔ وزیراعظم محمد نواز شریف پارے کہ چیلنج آک بھاز بھلن ئسر و اوفتتون مون تننگ آسان ہلوکہ، اللہ تعالیٰ نا فضل و کرم و خاص احسان و نما کمک ئس ہرانا سوب نن دا چیلنج آتے کرار کرار آ چٹفین، گدرینگوک آ وخت انا غلط پالیسی تا نتیجہ ٹی پاکستان نا ہرا حال مسوسس اودے سہی کننگ کن ہم وخت درکار ئس، اینو اسکان ماضی نا غلطی تے سہی کننگ اٹی لگوک اُن۔ لوڈشیڈنگ 16آن 18گھنٹہ اسکان مسکہ اودے ساڑی آ کہول آ اتنگ چنکو ہیت اس ہلوکہ۔ اوپارے کہ الیکشن آن گڈ نن غٹ اواری اٹ توسن کہ ہراوڑاٹ ننے داغٹ معاملہ غاتے چٹفوئی ئِ، ننا انت پالیسی مرے و انت فیصلہ کروئی مرے، نن وخت ئِ زیان کتون۔ الیکشن آن حکومت سازی اسکان نن اسہ اسہ منٹ ئِ تینا دا ایجنڈہ غا سجفسا کرین۔ اوپارے کہ تدینگوک آ حکومت خاص کر 2008ءآن 2013ءاسکان نا دور اٹی توانائی نا تنکی ئِ چٹفنگ نا داواکروک آک تاریخ ہی ترسا کریر۔ الیکشن اٹی کنا پارٹی نا کنڈآن پاننگاکہ مدت اس پار کہ لوڈشیڈنگ ئِ اٹ وخت اٹی چٹفیرہ تو ای پاریٹ کہ خلقت ئِ غلط ہیت پاننگ کپرہ، اول نن تینٹ جاگہ نا جاگہ سے آ سرمریر تو ولدا فیصلہ اس کینہ۔ 2018 ءٹی بجلی نا ویل پوروی وڑاٹ ایسر مریک و لوڈشیڈنگ چٹک۔ وزیراعظم پارے کہ صنعت ئِ مست آن ہی ہچ وڑنا لوڈشیڈنگ نا مون تروکی اف، اوپارے کہ نن صرف2018 ءاسکان سجفپنہ بلکن ننا سوچ اوکان ہم مون آٹی ئِ، پاکستان سوگوی تون مون آ ہِننگ ئِ۔ اوپارے کہ کم از کم نم ہموخلقت آتیان دا تو ہرفنگ نا کوشست کبو کہ واجہ غاک پابو کہ داملک اتون داخہ بھلو ظلم اس انت اکن کننگا۔ انت اکن پاکستان نا تہٹی لوڈشیڈنگ نا لعنت ئِ ودی مننگ کن اِلنگا، ولدا ہموخلقت ئِ ورندی تروئی مرے کہ ہرادانا زموار ئُ۔ وزیراعظم پارے کہ نن کراچی ٹی روشنائی تے بحال کننگ کن آپریشن نا بنائِ کرین ہرا برجاسلک۔ وزیراعظم پارے کہ اولیکو وار گوادر آن کوئٹہ اسکان سڑک جوڑ مسنے، دا پاکستان کن گیم چینجر اسے ، بلوچستان اٹی مایوسی خوشی ٹی بدلینگانے و دانا بنداو ئِ نن 2013ءٹی تخان۔ نن گیشتری نا باوجود پاکستان و بلوچستان نا خاطر ہموجاگہ نا جماعت آتے حکومت جوڑ کننگ نا سلہ تسن، دااولیکو گام ئس ہرانا بھاز بھلو جوان ئُ زئم اس تما۔ نن مولانا فضل الرحمان تون اواری اٹ خیبر پختونخوا ٹی ہم حکومت جوڑ کننگ کرینہ ولے اگہ دُن کرینہ تو دھرنہ والاک امر بے نقاب مسرہ ۔ نن پارین کہ خلقت ہرے کہ خیبر پختونخواہ ٹی ہراپوسکن انگا پاکستان جوڑ مننگ ئِ۔ وزیراعظم محمد نواز شریف پارے کہ ملک اٹی موٹروے جوڑ مننگ ئِ ، گوادر آن کوئٹہ اسکان سفر اٹی اِرادے لگاکہ ولے داسہ نم سہب انا نماز ئِ خوانسا کوئٹہ غان پیش تمرے تو پیشیم نا اِرغ ئِ نم گوادر اٹی کُننگ کیرے۔ دا انقلاب اسے ہرا بلوچستان اٹی بننگئِ۔ شونداری کن ننا عزم جواں ئِ ، نن انشاءاللہ ہر کمتی ئِ پوروکینہ و پاکستان ئِ پورو رفتار اتون مون آ دینہ۔ اوپارے کہ نن خلوک ئُ افن ، ڈٹ کر سخت انگا حالیت آتا مقابلہ ئِ کینہ و آخریکو دم اسکان ملک انا خذمت ئِ کرسا کینہ۔ داکان گڈ اوبرآمدات آتا بشخ اٹی نمان کارکرڈ نشان تروک آ برآمد کنندگان آتیٹی ایکسپورٹ ایوارڈز بشخ وپانٹ کرے۔
