پشاور۔ 15دسمبر (اے پی پی) صدر مملکت ممنون حسین پارینے کہ گدرینگوک آ کیہی دہائی تیان ویل و آزمائش آتا گواچی پاکستان داسہ بال کننگ کن تیار ئِ، قومی معیشت نا احیاءنا گمان آک روشنا مننگ ئُ ، دا چرجوئی ٹی چین نن تون ہم کوپہ سلوک ئِ وخت اس کہ نیامی ایشیانا مچ آ ڈیہہ دا پوسکن آ گمان و آزموندہ غاتیٹی ننا شریک کار جوڑ مننگ نا خواہش مند ئِ۔ داخیال آتا درشانی ئِ او پنچ شنبے آ غلام اسحاق خان انسٹیٹیوٹ آف سائنس اینڈ ٹیکنالوجی (جی کی) ٹوپی صوابی ٹی طالب علم آتون تران نا وخت آ کرے۔ داوخت آ سوسائٹی برائے فروغ انجینئرنگ سائنس اینڈ ٹیکنالوجی نا صدر انجینئر شمس الملک ، انسٹی ٹیوٹ نا ریکٹر جہانگیر بشر، ایگزیکٹو ڈائریکٹر شکیل درانی و بورڈ آف گورنر نا باسک آک ہم ساڑی ئسر۔ صدر مملکت پارے کہ گچین انگا تعلیمی ادارہ غاک قوم انا آخبت نا ضمانت مریرہ و بے شک جی کی ملک انا دن انگا ادارہ غاتیٹی نمان انگاادارہ ئِ ہرانا کیہی بشخ آتیٹی گچین پٹ وپولی کاریم مننگ ئِ ہرا بے کچ فائدہ مند و قومی شونداری کن سوگو بنداو فراوان کننگ ئِ۔ اوپارے کہ خاص وڑاٹ ہردے ئی معاملہ غاتیٹی امونیا نا کاریم اٹ اتنگ و اونا زہریلی زئم آتے محدود کرسا کارآمد جوڑ کننگ نا پٹ وپول بھاز متاثر کن ئِ ہنداوڑ کشش ثقل آن ٹربائن چلیفنگ نا ٹیکنالوجی آن بیدس مائکرو ہائیڈل و ایڈوانس سٹیج سولر سیل آن بجلی جوڑ کننگ نا چرجوئی ٹی ادارہ نا پٹ وپول و آزموندہ سہی سمت اٹی شون وشان پیش گامی ئِ۔ اوداسرسہبی آ ادارہ نا طالب علم و استاد آتے مبارکبادی پیش کرسا دااومیت نا درشانی ئِ کرے کہ او ہنداوڑجوان آن جوان ترنا جستجوٹی تینا کوشست آتے برجاتخرہ۔ صدر مملکت جیکی نا ریکٹر جہانگیر بشر و اونا رفقائے کار ئِ سخت خواری آ مبارکباد پیش کرے۔ داکان مست جیکی نا ریکٹر جہانگیر بشر تینا تران اٹی ادارہ ٹی کروک آ پٹ وپول نا کیہی بشخ آتیٹی کروک آ پٹ وپول و سرسہبی تیا سرجم آتے مون آتخاوخت اس کہ دودآن انجینئر شمس الملک ہم تران کرے۔ جہانگیر بشر صدر مملکت ئِ سونیئر ہم پیش کرے۔
