صوابی۔ 15دسمبر (اے پی پی) صدر مملکت ممنون حسین پارینے کہ پاک چین اقتصادی راہداری آن پاکستانی معیشت پین سوگو مریک و بروک آ وخت پاکستان نا شونداری نا پوسکن آ کسر آتے ملک۔ نیامی ایشیاو مچ آڈیہہ پوسکن آ گمان آتیان مستفید مننگ کن پاکستان نا کنڈااومیت انگا نظراٹ ہُننگ ئِ۔ اوداہیت ئِ ٹوپی ٹی غلام اسحاق خان انسٹی ٹیوٹ آف انجینئرنگ سائنسز اینڈ ٹیکنالوجی ٹی اڈ ہلوک آ دودآن تران کرسا پارے ہراٹی گورنر خیبر پختونخوا اقبال ظفرجھگڑا، ریکٹر غلام اسحاق خان انسٹیٹیوٹ آف انجینئرنگ سائنسز اینڈ ٹیکنالوجی جہانگیر بشر و ایگزیکٹو ڈائریکٹر شکیل درانی، انجینئر شمس الملک صدر سوسائٹی برائے فروغ انجینئرنگ سائنس اینڈ ٹیکنالوجی آن بیدس طالب علم آتیان بیدس شرفمند آ مہمان تا اسہ بھلو کچ اس ساڑی ئس۔ صدر مملکت پارے کہ سی پیک آن فائدہ ہرفنگ کن ڈیہہ نا ایلو ملک آک ہم تینا آمادگی ظاہر کرینو ہراڑآن دا ڈٹ انا اہمیت نا اندازہ ئِ کننگ مریک۔ صدر مملکت پارے کہ ہنر مند طالب علم آتے کن پاکستان اٹی مون آ ہِننگ نا بے پنا ہ وارخواہی ساڑی ئِ و سی پیک نا دروشم اٹ ننا ورنانسل داڑآن پبی فائدہ ہرفنگ کیرہ ۔ راج اٹی بدعنوانی نا ذکر ئِ کرسا اوپارے کہ کرپشن ملک انا ماس تے باریفے، دانا چٹفنگ کن ادارہ غاتون اوار اوار ننے غٹ ئِ اواری اٹ تینا کڑد ئِ ادا کروئی مریک۔ اوپارے کہ ننے ہموننگا بدعنوان عنصرآتا راجی بائیکاٹ ئِ کروئی مریک ہرا داٹی اوار ئُ۔ صدر مملکت پارے کہ ننے تینا بڑزکو تعلیمی معیار ئِ پین گچین جوڑ کننگ نا گرج ئِ۔ شون ہلوک ملک آتون مقابلہ کننگ کن المی ئِ کہ نن پوسکن آ تعلیم نا کنڈا پبی توجوہ ایتن۔ صدر مملکت پارے کہ پاکستان نا خرابی نا دور گدرینگانے، داسہ نن اسہ ہندن ئُ مزل اسے نا کنڈا راہی روان اُن ہراڑے روشنائی ئِ دا روشنائی شونداری نا دروشم اٹ ننا ساڑی آ و بروک آ نسل آتے کن ئِ۔ نن دہشت گردی نا مون ئِ تورسا دنیائِ دا پارینن کہ نن اسہ پرعزم و باہمت قوم اسے اُن۔ صدر مملکت چناتا تعلیم آ زورشاغسا پارے کہ طالب علم آک بے پرخ فنی و جدید تعلیم حاصل کیر انتئے دا اوفتا حق ئِ۔ اوپارے کہ ننا ورنانسل ئِ ایلو تہذیب آتے کورانگا تقلید آن بیدس تینا تہذیب و دودوربیدہ ئِ مون آ بایدے تخوئی مرے۔ صدر مملکت پارے کہ گچین انگا تعلیمی ادارہ غاک قوم انا آخبت نا ضمانت مریرہ و غلام اسحاق خان انسٹی ٹیوٹ پاکستان نا ہندن انگا ادارہ غاتیٹی نمان ترین ئِ۔ صدر مملکت پارے کہ کیہی بشخ آتیٹی گچین پٹ وپولی کاریم مننگ ئِ و دانا پٹ وپولی سرجزآک بے کچ مفید و قومی شونداری کن سوگو بنداو فراوان کننگ ئُ۔ داوخت آ اودے غلام اسحاق خان انسٹیٹیوٹ و کیہی بشخ جاٹ اٹی اونا سرسہبی تا بارواٹی رپورٹ ہم پیش کننگا۔ دود آن بورڈآف گورنرز نا صدر انجینئر شمس الملک ہم تران کرے۔
