اسلام آباد۔ 15دسمبر (اے پی پی) بنجائی وزیر خزانہ سینیٹر اسحاق ڈار پارینے کہ وزیراعظم محمد نواز شریف نا سروکی پاکستان ئِ ویل آتا پلویڑ آن کشانے و اودے زوت شونہال ، وت واجہ و باوقار ملک اس جوڑ کننگک، او پنچ شنبے آ بنجائی ایوان ہائے صنعت و واپار پاکستان (ایف پی سی سی آئی ) نا 40می ایکسپورٹ ایوارڈز نا دود آن تران کریکہ۔ اوپارے کہ 2013ءنا گچین کاری تیٹی مسلم لیگ (ن) تینا منشور ئِ قوم انا مون آ تخا ہراٹی معیشت ، توانائی ، انتہاپسندی و دہشت گردی و راجی بشخ انا ویل آتا ایسری آ توجوہ تخنگا۔ اوپارے کہ داویل آتے نن چیلنج سرپند کرسا کاریم کرین و اینو نتیجہ غاک غٹ انا مون آٹی ئُ۔ وزیر خزانہ پارے کہ بھلا اقتصادی ٹک آک گچین مننگ ئُ، معیشت نا پہیہ چلینگک تو ملک شون ہلیک۔ وزیر خزانہ پارے کہ میکرواکنامک سوگوی نا اعتراف ئِ مچ آ دنیا نا ادارہ غاک کننگ ئُ۔ وزیراعظم نا سروکی ٹی پاکستان دنیا ٹی شون ہلسا نظر بننگ ئِ و اینو بھلا بھلا ادارہ غاک پاکستان اٹی بزنس کننگ کن بننگ اٹی ئُ۔ دا غٹ ننا معاشی کارکڑد نا شاہدی اسے ئُ۔ اسحاق ڈار پارے کہ ملک آن بجلی نا کاختی ئِ چٹفنگ کن وزیراعظم نا کوشست آتے تاریخ اٹی یات تخک۔ اینو نہ صرف بجلی نا کمتی ئِ مر کننگانے بلکن آخبت نا گرج آتے مون آ تخسا ڈٹ بندی کننگانے۔ اوپارے کہ ملک اٹی امن و ایمنی کن دہشت گردی نا برخلاف گام گیج کننگانے ہرافتا است بڈ نتیجہ مون آبسنے۔ اوپارے کہ اقتصادی سوگوی دوئی کننگ آن گڈ داسہ ننا توجوہ بڑزکو شرح نمو نا دوئی آ ٹی ئِ۔ دا چرجوئی ٹی 7 درسد نا شرح نمو دوئی کننگ کن کوشست کننگ انگ ئِ۔ دابابت سی پیک نا ڈٹ بھاز اہم ئِ۔ اوپارے کہ ملک اٹی شفافیت نا بابت ساڑی حکومت نا گام گیج آک نمان ئُ۔ داچرجوئی ٹی او ای سی ڈی نا کنونشن آ دستخط کننگ آن بیدس اوپن گورنمنٹ پارٹنر شپ نا رکنیت و انسداد رشوت ستانی نا کنونشن اٹی اوار مننگ کن ہم کاریم نا بناءکننگانے۔ گڑاس خلقت معاشی تخریب کاری نا مرتکب مننگ ئُ۔ اوفتے انت سمائِ کہ شفافیت انتس مریک۔ اسحاق ڈار پارے کہ داعنصر آک چارہ کہ اگہ وزیراعظم نواز شریف ہنداوڑکاریم کرسا کرے تو اوفتا سیاسی آخبت انت مریک۔ وزیر خزانہ پارے کہ ملکی شونداری کن غٹ ئِ میثاق ءمعیشت نا رداٹ اواری اٹ مون آ بایدے ہنوئی مرے۔ داکان مست بنجاایوان ہائے صنعت و واپار پاکستان نا صدر عبدالرﺅف عالم ساڑی مروک آتا خیرمقدم ئِ کرسا پارے کہ وزیراعظم محمد نواز شریف نا سروکی ٹی پاکستان ڈیہہ نا اسہ بھلو معاشی واک اس جوڑ مرسا مون آ بریک۔ اوپارے کہ اینو پاکستان سیاسی و معاشی سوگوی نا کنڈاترندی اٹ روان ئِ، دہشت گردی نا مون ئِ توننگانے وخت اس کہ معاشی سرجزآک ترند مسنو۔ اوپوریاگر و صنعت کار آتا ویل آتا ایسری و اوفتے آسراتی تننگ کن وزیراعظم و وزیر خزانہ نا کوشست آتا ستائِ کرے۔
