بلتگر۔ 14دسمبر (اے پی پی) فرنٹیئر ورکس آرگنائزیشن (ایف ڈبلیو او)نا ڈائریکٹر جنرل لیفٹیننٹ جنرل محمد افضل پارینے کہ ہوشاب شاہراہ پاک چین اقتصادی راہداری نا اہم ئُ جزو اسے، دا سڑک نہ صرف چین اتون، قطبی علاقہ جاٹ بلکن بروک آ وخت آتیٹی چمن نا کسر اوغانستان و سینٹرل ایشیانا نیام اٹ پول انا کڑد ئِ ادا کیک۔ او چارشنبے آ داڑے سوراب ہوشاب شاہراہ نا افتتاحی دود انا وخت آ تران کریکہ۔ وزیراعظم محمد نواز شریف دا اہم شاہراہ نا افتتاح ئِ کرے وخت اس کہ بنجائی وزیر ڈٹ بندی ، شونداری و اصلاحات احسن اقبال، بنجائی وزیر سیمی و ریاستی امور لیفٹیننٹ جنرل (ر) عبدالقادر بلوچ، لیفٹیننٹ جنرل عامر ریاض، کمانڈر سدرن کمانڈ، مسکوہی وزیراعلیٰ بلوچستان عبدالمالک بلوچ ، سینیٹ نا باسک ، سول و عسکری کمامدارآک ہم دود اٹی ساڑی ئسر۔ ڈی جی ایف ڈبلیو او لیفٹیننٹ جنرل محمد افضل پارینے کہ اینو پاکستانی قوم انا تحاد نا دے ئِ، دا حکومت نا سیاسی عزم، الس نا واک و خواہش، پاکستان نا فوج، پولیس و ہندی انتظامیہ نا کمک و مخ تفی ، ایف ڈبلیو او نا ورناتا عزم و استقلال نا نشانی ئِ دا ننے یات ترفنگ ئِ کہ پاکستان نا غٹ ادارہ و حکومت ہراکاریم ئِ کننگ خواہر، اللہ نا فضل وکرم اٹ کرسا نشان ایترہ۔ اوپارے کہ دا ڈٹ ستمبر 2007ءٹی بناءکرے، فنڈ انا کمتی و امن عامہ نا مخدوش حالیت آتا سوب بند کروئی تما، جنوری 2014ءٹی وزیراعظم دا ڈٹ انا دُوارہ بناءکننگ نا فیصلہ ئِ کرے ایف ڈبلیو او نیسپاک ، این ایچ اے ریکارڈمدت اٹی دا ڈٹ ئِ پورو کرے۔ اوپارے کہ ایف ڈبلیو او نا 32ورنا دا سڑک نا جوڑ جاڑ نا وخت شہید مسر۔ اوپارے کہ دا سڑک پاک چین اقتصادی راہداری نا اہم ئُ جزو اسے، داسڑک نہ صرف چین اتون، قطبی علاقہ جاٹ بلکن بروک آ وخت آتیٹی چمن نا کسر اوغانستان و نیامی ایشیاءنا نیام اٹ پول انا کڑد ئِ ادا کیک۔ اوپارے کہ بلوچستان نا صوبائی حکومت ، پاکستان نا فوج، ایف سی بلوچستان تون اوار ایلو غٹ ادارہ غاتا کمکاری آ منت وار ئِ۔ ایف ڈبلیو او مشکل یا اڑاند آتے خاطر اٹی اتنگ آن بیدس ملک انا جوڑ جاڑ و شونداری ٹی داجوزہ، لگن اتون کاریم ئِ برجاتخک۔ اوپارے کہ داجاگہ نا الس کن دا شونداری نا اولیکو زینہ ئِ۔
