وزیراعظم برسراقتدار بننگ آن پد بلوچستان نا حالیت آتے گچین جوڑ کننگ نا وعدہ غاتے پورو کننگ ئِ
بلتگر۔ 14دسمبر (اے پی پی) وزیراعلیٰ بلوچستان نواب ثناءاللہ خان زہری پارینے کہ شاہراہ سوراب ہوشاب نا جوڑ جاڑ پورو مننگ تون اوار جوڑ جاڑ و شونداری نا ایلو تعلقدار ڈٹ جاٹ ریکارڈ مداٹی پورو مننگ آن پاک چین اقتصادی راہداری (سی پیک) حقی وڑاٹ بلوچستان کن گیم چینجر اس ثابت مسنے، وزیراعظم محمد نواز شریف بلوچستان نا الس اتون ہرا ہرا وعدہ غاتے کرینے او ٹھوس ڈٹ آتا دروشم اٹ پورو مننگ ئِ۔ او چارشنبے آ شاہراہ سوراب ہوشاب نا افتتاحی دودآن تران کریکہ۔ وزیراعظم محمد نواز شریف ، بنجائی وزیر ڈٹ بندی ، شونداری و اصلاحات احسن اقبال ، بنجائی وزیر سیمی و ریاستی امور لیفٹیننٹ جنرل (ر) عبدالقادر بلوچ، لیفٹیننٹ جنرل عامر ریاض، کمانڈر سدرن کمانٹ ، مسکوہی وزیراعلیٰ بلوچستان ڈاکٹر عبدالمالک بلوچ ، ڈی جی ایف ڈبلیو او لیفٹیننٹ جنرل محمد افضل ، سینٹ نا باسک، سول و عسکری کمامدارآک دود اٹی ساڑی ئسر۔ وزیراعلیٰ بلوچستان نواب ثناءاللہ خان زہری پارے کہ بلوچستان نا الس غٹ مہمان تا است انا ہب اٹ خیر مقدم ئِ کیرہ و وزیراعظم نا ہم بے کچ منت وار ئُ ہرابلوچستان و اونا الس ئِ ہمیشہ دوست تخا، وزیراعظم نا داڑے ساڑی گری و وار وار بلوچستان نا دورہ بلوچستان نا الس تون اونا مابت نا شاہدی اسے، وزیراعظم نا سروکی ٹی بنجائی حکومت نا کمکاری پین وخت اس ہم بلوچستان ئِ دوئی مریک۔ اوپارے کہ بلوچستان ئِ پسماندگی آن کشنگ و شونداری نا کسر آ روان کننگ کن نن دے و نن کاریم کننگ اُن۔ اوپارے کہ پاکستان مسلم لیگ (ن) لس گچین کاری تا وخت وعدہ کریسس کہ بلوچستان تون مروک آ نا انصافی تا ازالہ ئِ کینہ۔ وزیراعظم محمد نواز شریف برسراقتدار بننگ آن پد بلوچستان نا حالیت آتے گچین جوڑ کننگ کن جندی است خواہی ہلک و او تینا وعدہ غاتے پورو کننگ ئِ۔ اوپارے کہ شاہراہ نا جوڑ جاڑ نا دا ڈٹ ہم وزیراعظم نا خصوصی است خواہی نا خصوصی منت وار ئِ۔ اوپارے کہ پاک چین اقتصادی راہداری ڈٹ اٹی گوادربندرگاہ ئِ کلیدی اہمیت دوئی ئِ۔ اوپارے کہ بنداوی ڈھانچہ نا فراوانی زرکاری و شونداری نا پوسکن ئُ کسر ملک، سی پیک کون آ غیر معمولی ڈٹ انارداٹ شاہراہ تے خصوصی اہمیت دوئی ئِ، اسہ وخت اسے آن شونداری نا چاروک الس ئِ ٹھوس شونداری کاریم مرسا نظر بننگئِ، دانا کریڈٹ وزیراعظم محمد نواز شریف ئِ ملک۔ اوپارے کہ شاہراہ سوراب جوڑ مننگ آن پد کشاری و معدنی وسیلہ غاتا منڈی تسکان رسینگ، بھلا شار تسکان ہن و بر اٹی آسراتی ملک و جوڑ جاڑ و شونداری نا سرجزآک ہم ترند مریرہ۔ اوپارے کہ بلوچستان نا کیہی علاقہ غاتے اسہ ایلو تون مربوط کننگ و کرکی علاقہ غاتیٹی روڈ نیٹ ورک نا بشخ جوڑ کننگ اٹی ایف ڈبلیو او نا کڑد صفت نا قابل ئِ۔ اوپارے کہ قلات ، چمن کوئٹہ سیکشن، گوادر تربت روڈ، خضدار روڈ، ژوب روڈ، خاراو کچی تون اوار شاہراہ تا جوڑ جاڑ نا ایلو ڈٹ آتیا کاریم ترندی اٹ برجاہ ئِ۔ شاہراہ تا جوڑ جاڑ، ہراڑے واپاری سرجزآتے مون آ دیک ، ہمولس بندغ نا زند آتیٹی ہم آسانی ودکی کیک۔ اوپارے کہ تربت نا فاصلہ مست 24گھنٹہ غاتیٹی طے مسکہ ولے پوسکن آ شاہراہ جوڑ مننگ آن گڈ دا فاصلہ داسہ ہفت آن ہشت گھنٹہ ٹی طے مریک۔
