ہوشاب ، آواران، لسبیلہ روڈ، پنجگور آن پروم 40کلومیٹر روڈ انا جوڑ جاڑ نا پڑو
تربت۔ 14دسمبر (اے پی پی) وزیراعظم محمد نواز شریف الس نا خذمت و ملک انا جوڑ جاڑ و شونداری ئِ اقتدار اسکان رسیفنگ نا اسٹ انگا کسر گوندسا پارینے کہ ملک و قوم نا شونداری کن سنجیدہ سروکی نا گرج مریک، گڑاس بندغ ورناتیٹی ہیجان ودی کرسا اقتدار اسکان سرمننگ نا کوشست کننگ ئُ دُن انگا بندغ آک نہ صرف تیان چہرہ بلکن راج ئِ ہم گندہ کننگ نا کوشست کیرہ ہرافتا کاریم کچرہ خسنگ مرے، اوقوم ئِ جوڑ جاڑ کننگ کپسہ، پاکستان نا الس داسہ 2018 ءٹی فیصلہ کیک کہ دیر اوفتا گچین خذمت ئِ کننگ ئِ، 3سال اٹی سوگو پاکستان نا بنداو ئِ تخانن اینو پاکستان بھاز گچین حالیت اٹی ئِ ، ملک اناکنڈ کنڈ اٹی روڈ آتا جوڑ جاڑ و شونداری نا عمل جاری ئِ۔ او چارشنبے آ داڑے 448کلومیٹر مریس این 85سوراب ۔ہوشاب شاہراہ نا افتتاحی دودآن تران کریکہ۔ داوخت آ بلوچستان نا وزیراعلیٰ نواب ثناءاللہ خان زہری ، گورنر بلوچستان محمد خان اچکزئی ، بنجائی وزیر ڈٹ بندی و شونداری احسن اقبال، بنجائی وزیر سیفران لیفٹیننٹ جنرل (ر) عبدالقادر بلوچ، سینیٹر حاصل بزنجوآن بیدس کمانڈر سدرن کمان لیفٹیننٹ عامر ریاض، ڈی جی ایف ڈبلیو او لیفٹیننٹ جنرل محمد افضل ئسک ہم ساڑی ئسر۔ داوخت آ وزیراعظم ہوشاب آواران لسبیلہ روڈ انا جوڑ جاڑ و پنجگور آن پروم اسکان 40کلومیٹر سڑک نا جوڑ جاڑ نا ڈٹ آتاہم پڑو کرے۔ وزیراعظم پارے کہ اودے بلوچستان اٹی سڑک آتا جوڑ جاڑ نا ڈٹ آتا بے حد خوشی ئِ ۔ پاکستان نا دا بشخ شونداری نا ہرا دور آن گدرینگ انگ ئِ اونامثال ملیپک۔ اوپارے کہ اینو اسہ پوسکن ئُ بلوچستان اس جوڑ مننگ ئِ ہرانا مطلب دادے کہ اسہ پوسکن ئُ پاکستان اس جوڑ مننگ ئِ۔ بلوچستان اٹی بے مثل شونداری مننگ ئِ۔ ہرا شاہراہ جوڑ جاڑ کننگ انگ ئِ اوفتیان گڑاس سی پیک نا بشخ ئُ و گڑاس نن تینٹ جوڑ کننگ اُن۔ شاہراہ تا جوڑ جاڑ نا ڈٹ آتیا ارب کھرب روپئی لگنگ ئِ ولے ننے دا ارب کھرب آتا لگنگ نا بھاز خوشی ئِ۔ اوپارے کہ بلوچستان اٹی شاہراہ تا جوڑ جاڑ آن نن بلوچستان آ ہچ ئُ مہربانی اس کپننگ اُن۔ دا صوبہ نا الس نا حق و حکومت نا فرض ئِ و نن بایدے صوبہ کن داکان زیات پین کین۔ وزیراعظم پارے کہ خنجراب آن گوادر اسکان نا علاقہ شاہراہ تا کمک اٹ منسلک مننگ آن اقتصادی سرجزآک ودرہ ، بے روزگاری و نیزگاری چٹک۔ اوپارے کہ دا اسہ سڑک اسے نا جوڑ جاڑ اف بلکن گیم چینجر ڈٹ اسے داڑآن شونداری نا کسرآک ملنگرہ۔ سڑک آتا جوڑ مننگ آن اسکول آک جوڑ مریرہ و اسکول و یونیورسٹی تا جوڑ مننگ آن تعلیم نا وارخواہی ودی مریک۔ سڑک آتا جوڑ مننگ آن ہسپتال آک جوڑ مریرہ و خلقت آتے درمان و جان جوڑی نا آسراتی دوبریک۔ سڑک آتا جوڑ مننگ آن فیکٹریک جوڑ مریرہ ، خلقت آتے روزگارملک، کشار گر آتا منڈی تسکان رسینگ گچین مریک و صوبہ ٹی اقتصادی شونداری مریک۔ وزیراعظم پارے کہ ہر پوسکن آ کسر اسہ پوسکن ئُ مزل اسے نا ڈس ایتک، ہرپوسکن آ سڑک آن اومیت نا اسہ پوسکن ئُ چراغ اس لگک۔ بلوچستان اٹی اومیت نا ان گنت چراغ روشنا مننگ ئُ۔ ہوشاب سوراب روڈ ہم اسہ روشنا ئُ چراغ اسے۔ اوپارے کہ بلوچستان نا شونداری ننا اولیت آتیٹی سرفہرست ئِ۔ ای گدرینگوک آ تلخ داستان آتے وار وار دہرائفنگ خواپرہ کہ ہراوڑصوبہ ئِ شونداری آن محروم تخنگا۔ نن گدرینگوک ئِ و صوبہ نا حالیت آتے بدلیفنگ نا فیصلہ کرینن۔ بلوچستان نا الس ئِ ہم شونداری نا ہمو حق دوئی ئِ ہرا کراچی ، لاہور و پشاور کون آ شارتا الس ئِ دوئی ئِ۔ اوپارے کہ صوبہ نا شونداری نا تغ داسہ پورو مننگ اٹی ئِ ، گمان حقیقت اس جوڑ مسنے و دانا اسہ شاہدی ہوشاب سوراب روڈ ئِ۔ اوپارے کہ دا شاہراہ نا جوڑ جاڑ آن گوادر بندرگاہ نیشنل ہائی وے تون منسلک مریک ، سنٹرل ایشیااسکان رسینگ نا دا غٹ آن کم انگا فاصلہ ئِ۔ دا شاہراہ رابطہ و سی پیک نا اہم ئُ بشخ اسے۔ کوئٹہ آن گوادر اسکان اِرا دے لگاکہ داسہ اگہ سہب انا نماز آن گڈ کوئٹہ غان پیش تمر تو پیشیم اسکان گوادر آ سرمننگ کیرہ دا تبدیلی اسے دادے پوسکن آ پاکستان پارہ۔ اوپارے کہ داڈٹ انا پوروی کن ایف ڈبلیو او ئِ این ایچ اے نا پورو کمک دوئی مسنے و کم آن کم وخت اٹ داسڑک جوڑجاڑ کننگانے۔ 5سال آن زیات نا کاریم ئِ سوادوسال اٹی پورو کننگانے۔ داڑآ بھلو زر اس خڑچ مسنے۔ دا 22ارب نا ڈٹ اسے، داشاہراہ نا جوڑ جاڑ اٹی ایف ڈبلیو او نا ورناتتون اوار کیہی خلقت نا دتراوار ئِ ہرافتے خراج عقیدت پیش کینہ۔ شونداری نا دا ڈٹ تینا جان تا نذرانہ ئِ ترسا پورو کننگانے دا قربانیک تاریخ اٹی نوشتہ مریرہ۔ اوپارے کہ الس فیصلہ کیک کہ دیر خذمت نا کسر آ روان ئِ و دیر ورناتا جوزہ غاتون گوازی کرسا اقتدار اسکان سرمننگ خواہک۔ دافیصلہ 2018 ءٹی مریک۔ اوپارے کہ ہرافتا کاروبار ہی کیچڑ خسنگ مرے او قوم ئِ صرف تفریح فراوان کننگ کیرہ جوڑ جاڑ کننگ کپسہ۔ اوپارے کہ نن اسہ شائستہ قوم و روایت آتے منوک آ خلقت اُن بھلا تا عزت و چنکا تیا رحم نناراج انا خاصا ئِ و ننا تینا تہذیبی روایت آک ئُ ہرافتے ٹی ایلوفتے مخاطب کننگ نا ہم آداب ارے۔ اوپارے کہ روایت آتے برباد کروک آتے تاریخ ننگ اسلاف نا پن اٹ یات کیک۔ اوپارے کہ نن پوسکن آ پاکستان نا سوگو بنداو ئِ تخانن۔ 2016ءنا پاکستان 2013ءنا پاکستان آن جتا ئِ و 2018 ءنا پاکستان 2016ءنا پاکستان آن جتا مریک۔ اوپارے کہ بجلی نا تنکی چٹنگ ئِ۔ داسہ مریس وخت ئُ پاس نا لوڈشیڈنگ مفننگ ئِ ، معیشت تینا نت تیا سلیسنے، جہانی برادری پاکستان ئِ روشنا گمان آتا دنیا ناوڑاٹ ہُننگ ئِ ، شونداری نا رخ داسہ غیر شونداری یافتہ علاقہ و بلوچستان نا کنڈاٹی ئِ دا پوسکن آ پاکستان ئِ، ننے غٹ ئِ اواری اٹ داپاکستان ئِ جوڑ جاڑ کروئی ئِ۔ وزیراعظم پارے کہ مسکوہی وزیراعلیٰ بلوچستان ڈاکٹر عبدالمالک بلوچ اوڑآن ہوشاب، آواران ، لسبیلہ روڈ نا جوڑ جاڑ نا خواست کرینے۔ ای وزیراعلیٰ تون ہیت کرینٹ و فیصلہ کرینٹ کہ بنجائی و صوبائی حکومت اواری اٹ داسڑک ئِ جوڑ جاڑ کیرہ۔ ای داوخت آ دا ڈٹ انا منظوری نا پڑو ئِ کیوہ۔ اوپارے کہ سوراب ہوشاب 449 کلومیٹر روڈ صرف کوئٹہ و گوادر نا فاصلہ ئِ کم کپک بلکن دا کوئٹہ آن مون آ سرائے مغل کوٹ حسن ابدال ہکلہ و اوڑآن مون آ خنجراب اسکان رابطہ استوار کیک و دانا کمک اٹ سیل و سواتیک ہم بریرہ و واپاری و اقتصادی شونداری ئِ ہم مون آ دننگ رسینگک۔ وزیراعظم داوخت آپنجگور آن پروم اسکان 40کلومیٹر سڑک نا جوڑ جاڑ ناہم پڑو ئِ کرے و پارے کہ داسڑک نا جوڑجاڑ آن علاقہ ٹی گچینی بریک و شونداری نا وارخواہی ودی مریک۔
