اسلام آباد۔ 14دسمبر (اے پی پی) صدر مملکت ممنون حسین ئِ پاکستان اٹی تعینات مروک آ ہفت ملک آتا سفیر آک تینا سفارتی سند آتے پیش کریر۔ ایوان صدر اٹی چارشنبے آ اڈ ہلوک آ اسہ دود اسے ٹی سند سفارت پیش کروک آتیٹی یمن، کویت، رومانیہ ، مالی ، کولمبیا، موریطانیہ و البانیہ نا سفیر آک اوار ئسر۔ داکان مست ہر ملک انا پندار سفیرئِ بگھی آ جتا جتا ایوان صدر نا بنجائی درگہ غا اتنگا ہراڑے اوفتے گارڈ آف آنر پیش کننگا۔ داوخت آ تعلقدار ملک و پاکستان نا قومی ترانہ ئِ ہم پیش کننگا۔ اوکان گڈ پوسکن تعینات سفیر آک صدر مملکت تون جتا جتا اوڑدہی کریر۔ داوخت آ صدر مملکت ممنون حسین پارینے کہ پاکستان غٹ ملک آتون دوستانہ تعلقداری خوائک، خاص وڑاٹ ڈیہہ ٹی امن و شونداری کن ہمسایہ ملک آتون دوستانہ تعلقداری بھاز اہم ئِ۔ اوپارے کہ ڈیہہ ٹی امن و سوگوی کن ہر ملک ئِ تینا کڑد ادا کروئی مریک۔ اوپارے کہ پاکستان اٹی زرکاری نا گچین وارخواہی ساڑی ئِ ہراڑآن زرکار آک بایدے پبی فائدہ ہرفیر۔ صدر مملکت پارے کہ ضرب عضب آپریشن سرسہبی اٹ جاری ئِ و آخریکو دہشت گرد انا چٹفنگ اسکان دا آپریشن برجاسلک۔ صدر مملکت پاکستان اٹی تعینات مروک آ سفیر آتے مبارکباد ترسا دااومیت نا درشانی ئِ کرے کہ او تینا ملک آتون پاکستان نا تعلقداری تے پین مون آ دیرہ۔ سند سفارت پیش کروک آ سفیر آتیٹی یمن نا سفیر محمد موتہرالسابی ، کویت نا نصر عبدالرحمان جاثرال مہوتہری، رومانیہ نا نکولاگویا، مالی نا بوبکر گورودیال، کولمبیانا جوہان الفریڈو پینٹو سویڈرا، موریطانیہ نا سیدی محمد لگطاف و البانیہ نا جینٹی گیز پلی اوار ئسر۔
