نیویارک۔ 13دسمبر (اے پی پی) پرتگال نا مسکوہی وزیراعظم انٹونیو گوئٹرز اقوام متحدہ نا سیکرٹری جنرل نا عہدہ ناسوغند ہرفینے۔ او یکم جنوری 2017ءآ جہانی ادارہ نا نہہ میکو سروک نا حیثیت آن باقاعدہ وڑاٹ بروک آ پنچ سال اکن تینا زمواری تے سنبھالک۔ اقوام متحدہ نا سیکرٹری نا عہدہ نا مدت پنچ سال ئِ و ہرکسہم زیات آن زیات اِرا وار دازمواری آ فائزسلنگ کیک۔ گوئٹرز سویلی کوریا آن تعلق تخوک آ بان کی مون نا جاگہ غا اقوام متحدہ نا سیکرٹری جوڑ مسنے ہرانا عہدہ نا ارٹ میکو مدت 31دسمبر آ پورو مننگ ئِ۔ انٹونیو گوئٹرز تدوک آ دے اقوام متحدہ نا 193باسکی جنرل اسمبلی نا مون آ تینا عہدہ نا سوغند ہرفے۔ داکان مست جنرل اسمبلی نا باسک آک سبکدوش مروک آ سیکرٹری جنرل بان کی مون ئِ اونا خذمت آتیاخراج تحسین پیش کریر۔ اقوام متحدہ نا جنرل اسمبلی اینخو نا سال اکتوبراٹی گوئٹرزئِ سیکرٹری جنرل نا عہدہ غا گچین کریسس۔ او داکان مست 1995ءآن 2002 ءاسکان پرتگال نا وزیراعظم سلیسنے اوکان گڈ او 2005ءآن 2015ءاسکان اقوام متحدہ نا ہائی کمشنرمہاجرین نا وڑاٹ خذمت انجام تسوسس۔ او جہانی ادارہ نا 71سالہ تاریخ اٹی اولیکو سیکرٹری جنرل ئِ ہراحکومت اسے نا سروک مسنے۔
