کوئٹہ۔ 13دسمبر (اے پی پی) صوبائی دارالحکومت کوئٹہ تون اوار مچ آ بلوچستان اٹی عید میلادالبنی ﷺ روایتی جوش و جوزہ و شان و شرف اٹ اڈتننگا، کوئٹہ ٹی دے انا بناء21توپ آتا سلامی آن مس وخت اس کہ مچ آ صوبہ ٹی عئید میلادالنبی نا وخت آ کیہی چنکو بھلو جلوس کشنگا و مسیت آتیٹی امت مسلمہ و پاکستان نا سوگوی کن خصوصی دعا کننگا، صوبائی دارالحکومت کوئٹہ ٹی کیہی ہند آتیان جشن ولادت نا کیہی جلوس کشنگا ہرا تینا مقررہ کسرتیان مرسا بنجائی جلوس میزان چوک آ سرمس ہراڑے عالم دین و مشائخ نا کماشی ٹی بنجائی جلسہ عیدمیلاد النبی اڈ ہلک ہرانا بناءتلاوت قرآن پاک حمد و نعت خوانی آن کننگا۔ بنجائی جلسہ ٹی عالم دین و مشائخ سیرت طیبہ نا جتا گوشہ غاتیا درشانِ خیال کریر۔ عید میلاد النبی نا جلوس نا سیکورٹی کن فول پروف بست و بند کننگاسس۔ سیکورٹی پلان نا رداٹ کوئٹہ شار ئِ 7جتا سیکٹراٹی بشخ وپانٹ کننگاسس۔ جلو س نا سیکورٹی آ ایف سی ، بی سی، پولیس ، اے ٹی ایف، آرآرجی و لیویز نا 3700 کارندہ غاتے تعینات کننگا جلوس نا مانیٹرنگ کن ڈپٹی کمشنر و ڈی آئی جی دفتراٹی کنٹرول روم اس اڈ ترسا سی سی ٹی وی کیمرہ غاتا کمک اٹ چاروکی کننگا۔ مچ آ شاراٹی 20 خصوصی ناکہ خلنگا وخت اس کہ 16موبائل گشت تشکیل تننگاسس۔ سیکورٹی کن ایف سی نا 750کارندہ بلوچستان کانسٹیبلری و سی ٹی ایف نا 400 کارندہ، اے ٹی ایف نا 100 کارندہ ، آرآرجی نا 70 کارندہ ، ٹریفک پولیس نا 140کارندہ متعین کننگا وخت اس کہ مش تیا لیویز کارندہ غاتے تعینات کننگاسس۔ بلوچستان نا تہٹی ہم عید میلاد النبی نا جلوس کشنگا، ڈیرہ مراد جمالی ، سیبی ، جعفرآباد، ڈیرہ بگٹی، کوہلو ، بارکھان، نوشکی، چاغی، دالبندین ، ہرنائی ، لورالائی، چمن، ژوب، قلعہ سیف اللہ، قلعہ عبداللہ تون اوار مچ آ صوبہ ٹی عید میلادالنبی شان و شرف اٹ اڈتننگا۔
