سکھر۔ 13دسمبر (اے پی پی) قومی اسمبلی ٹی قائد حزب اختلاف سید خورشید احمد شاہ پارینے کہ پوریا گر برادری ملکی معیشت اٹی مخ انا ملی نا حیثیت تخرہ، پوریاگرتا ویل آتا چٹفنگ آن بیدس ملکی شونداری ، شونہالی ممکن اف، گرین مرچنٹس ایسوسی ایشن نا جمہوری اندازاٹ گچین کاری کرفنگ خوش آئند گام اسے اومیت ئِ پوسکن گچین مروک آ عہدیدار آک پوریاگرتا شرحالی و ویل آتاایسری کن کاریم کیرہ۔ جاری کروک اعلامیہ نا رداٹ داخیال آتا درشانی ئِ او گرین مرچنٹس ایسوسی ایشن اناج بازار نا پوسکن گچین مروک آ عہدیدار آتا اڈ ہلوک سوغندی دوداٹ مہمان خاص نا وڑاٹ تران کرسا کرے۔ ہراٹی ایس ایس پی سکھر امجد شیخ، مسکوہی باسک صوبائی اسمبلی ڈاکٹر نصراللہ بلوچ، ضلع کونسل نا چیئرمین اسلم شیخ، سکھر پریس کلب نا صدر جان محمد مہر، لالہ اسد پٹھان و ایلوفک ساڑی ئسر۔ دودآن سکھر اسمال ٹریڈرز نا صدر حاجی محمد جاوید میمن ، گرین مرچنٹس ایسوسی ایشن نا چیئرمین کامل فاروقی، مختیار شامی و ایلوفک تران کریر۔ داکان مست سکھر اسمال ٹریڈرز نا صدر حاجی محمد جاوید میمن گرین مرچنٹس ایسوسی ایشن نا پوسکن گچین مروک آ صدر زبیر قریشی، جنرل سیکرٹری شبیر میمن تون اوار ایلو عہدیدار آتیان اوفتا عہدہ غاتا سوغندہلک و اوفتے مبارکبادی تس۔ سوغندی دود اٹی سکھر اسمال ٹریڈرز نا عبدالستار راجپوت، شکیل قریشی، پرویز چنہ، شریف ڈاڈا، عبدالقادر شیوانی، بابوفاروقی، عامر فاروقی، رئیس قریشی ، منیر میمن، معراج وارثی تون اوار پوریاگرآک بھلو کچ اسے ٹی ساڑی ئسر۔ دود اٹی گرین مرچنٹس ایسوسی ایشن نا کنڈآن مہمان تے سندھ انا روایتی ٹیکی سندھی ٹوپی و اجرک ہم پیش کریر۔
