اسلام آباد۔ 13دسمبر (اے پی پی) وزیر داخلہ چوہدری نثارعلی خان پارینے کہ بی جے پی نا ساڑی گری ٹی پین ہچ گہس ئِ ہندوستان ئِ مذہب نا بنداو آ بشخ وپانٹ کننگ نا کوشست نا گرج اف، بھارت ئِ مذہبی بنداو تیا پاکستان آخا بلکن بی جے پی سرکار نا پالیسیک بشخ وپانٹ کننگ ئُ ہراپارٹی و حکومت نابنداو و منشور ہی مذہبی جنونیت ، تفریق، منافرت و بیدادی آ مبنی مرے او ہرا مون اٹ پاکستان آ الزام تراشی کننگ کیک۔ پاکستان ئِ دہ ٹکر آتیٹی بشخ وپانٹ کننگ نا بھارتی وزیر داخلہ نا گیدڑ بھبکی آردعمل نا درشانی ئِ کرسا وزیر داخلہ چوہدری نثارعلی خان پارے کہ بی جے پی حکومت نا پاکستان ئِ ٹکر کننگ محض اسہ گنوک اسے نا تغ ئِ ہرا انشاءاللہ وخت اس ہم پورو مفک۔ اوپارے کہ ہراحکومت نا دوک مظلوم کشمیری تا خون اٹ رنگ ئُ و ہراڑے ریاستی جبر حکومتی پالیسی نا بشخ مرے او امر دہشت گردی نا ہیت ئِ کیرہ۔ ہندومسلمان ایلم ایلم نا صدا ئِ بڑزکروک آک ذرس تینا مسکوہی و آخبت آ نظر شاغر و ہریر کہ ہراوڑ ریاستی مشینری نا بیہمانہ کاریم اٹ اتسا کشمیری و مسلمان تا خون اتون ہولی گوازی کننگک و بھارت اٹی ساڑی مسلمان ، دلتوں ، عیسائی و ایلو اقلیت آتا حق انا استحصال کننگک اوفتے کن زند انا دنگ ئِ تنگ کننگک۔ حقیقت دادے کہ داوخت آ بی جے پی نا حکومت اٹی غٹ اقلیت آک شدید خلیس و بھیم انا گواچی ئُ۔ بھارت نا ساڑی آ سرکار صرف کشمیر ئِ ہی آخا بلکن مچ آ ہندوستان اٹی تینا ہندا مسخت آتا خاطر جتا مذہب آتا نیام اٹ نفرت نا دیوار اس تفینے و ہندوستان ئِ اسہ جنگ انا پٹ اس جوڑ کرینے۔ بابری مسیت آن ہلیس مسکوہی منہ سال آتیٹی مسلم و اقلیت کش پھسات ہندوستان نا ساڑی آ حکومت نا سیاسی و سرکاری پالیسی نا شاہدی اسے۔ ریاستی سرپرستی ٹی مخالف آتیا بیداد، خلقت نا مون ئِ مون کننگ ، اقلیت آتا لس خون و نسل کشی کون آ بھیانک گام گیج آک ساڑی آ ہندوستانی حخومت نا تینا الس ئِ ٹیکی اسے۔ بھارتی سرکار نا دااقلیت کش پالیسی تیان صرف مسلمان ہی آخا بلکن بھارت اٹی ساڑی آ غٹ اقلیت آک خوفزدہ ئُ۔ وزیر داخلہ پارے کہ دہشت گردی نا سوب پاکستان اف بلکن ہمو ملک ئِ ہراڑے انسانی حق انا پامالی ، جبر و بیدادی و مذہبی منافرت ریاستی پالیسی نا بشخ ئِ ۔ وزیر داخلہ پارے کہ پاکستان امن خوائک ولے ہندوستان نا تسلط واجارہ داری و ساڑی آ بھارتی حکومت نا پرتشدد پالیسی تے ہچ ئُ دروشم اسے ٹی امنا کپک و دا اصول آ غٹ پاکستانی قوم متحد و متفق ئِ۔ اینو ہندوستان نا حکمرانک خن تے ملر ہریر تو اوفتے تینٹ نظر بریک کہ اوفتا پالیسیک ہراڑے ہندوستان ئِ منقسم و انتشار نا گواچی کرینو ہموڑے پاکستانی قوم ئِ دا پالیسی تا برخلاف و زیات متحد کرینو۔
