اسلام آباد۔ 09 دسمبر (اے پی پی) مسلم لیگ(ن) نا راہشون و پارلیمانی سیکرٹری خزانہ و اقتصادی امور رانا محمد افضل خان پارینے کہ پاکستان و بھارت نا نیام اٹ جنگ انا ہچ ئُ خطرہ اس اف، ہڑتوم آ ملک آک ایٹمی واک مننگ نا ناطہ جوان چارہ کہ جنگ ہچ ئُ آپشن اس اف ولے ڈیہہ ٹی بے چیٹی نا سوب پاکستان ئِ تابع ریاست جوڑ کننگ نا خواہش ئِ ہراوخت اس ہم پورو کننگ مفک ، مچ آسویلی ایشیانا گچین آخبت تین پہ تینی کمکاری ٹی تخوک ئِ ولے بھارت نا کشمیر پالیسی مچ آڈیہہ ئِ دھماکہ خیز حالیت آتیا ایسونے سرکرینے ، دنیا 11ملین نفوس آ تالان کشمیرنا آبادی آن زیات دیر لاتعلق سلنگ کپک۔ داخیال آتا درشانی ئِ او پالیسی ادارہ پائیدار شونداری (ایس ڈی پی آئی ) نا 19می سالانہ کانفرنس نا ایسری دود آن بحیثیت مہمان خاص تران کرسا کرے۔ کانفرنس نا وخت موسمیاتی بدلی، قدرتی آفت آتا خلیس آتا مقابلہ، سویلی ایشیاٹی امن و سلامتی ، بریبری آ مبنی شہریت و شاری حق، جنگ و آفت زدہ علاقہ غاتیٹی غذائی رکھ انا حالیت آتیان بیدس جان جوڑی، توانائی ، معیشت و خذمت آتا سرحال آتیا ہیت وگپ کننگا، جتا جتا نشست آتا وخت جتا شونداری بشخ آتا چاہندارآک خیال آتا درشانی ئِ کریر۔ رانا محمد افضل خان پارے کہ چین پاکستان اقتصادی راہداری اسہ حقیقت اسے و حکومت نا سخت کوشست آتا بدولت مارچ 2017ءاسکان اونا فیز 1پورو مریک۔ پاکستان تحریک انصاف نا راہشون و باسک قومی اسمبلی اس عمر خیال آتادرشانی ئِ کرسا پارے کہ وزیراعظم محمد نواز شریف و عمران خان تون اوار پاکستان نا غٹ قابل ذکر سیاسی سروک بھارت تون امن و کمکاری نا خواہندار ئُ۔ نن دادے ہم بایدے مون آتخن کہ بھارت صرف مودی نا پن اف بلکن سیم پار ہم امن تون وابستہ بھاز بھلو لابی اس ساڑی ئِ۔ مسکوہی سفیر شفقت کاکاخیل کانفرنس نا ساڑی مروک و مندوبین آتا منت واری ئِ ادا کرے۔ داکان مست”پیرس معاہدہ نا روآن علاقائی کمکاری“ نا سرحال آ اڈ ہلوک آ نشست آن واٹراینڈ انوائرمنٹ فورم آتا چیئرمین ، کلائمیٹ ایکشن نیٹ ورک نا سخبے و شاسٹ ، ایس ڈی آئی نا ڈاکٹر عمران خالد و شکیل رامے، ایکشن ایڈ نا فاظمہ شاہین، آئی جی فار سٹری محمودناصر و ایس ڈی پی آئی نا ڈاکٹر عابد قیوم سلہری ہم تران کرے۔
