اسلام آباد۔ 08دسمبر (اے پی پی) وزیر مملکت بنجائی تعلیم و کسبی تربیت انجینئر بلیغ الرحمان پارینے کہ بدلینگوک آ حالیت آتا پیش نظر قومی واک انا عنصر ترکیبی ئِ یکجا کننگ نا گرج ئِ تانکہ قومی شونداری نا مسخت ئِ دوئی کننگ مرے۔ او پنچ شنبے آ وزارت ڈٹ بندی ، شونداری و اصلاحات نا کنڈآن ”قومی سوگوی، شونداری و واک اٹی کارفرما عنصر ترکیبی”نا سرحال آ کانفرنس نا افتتاحی دودآن تران کریکہ۔ وزیر مملکت کانفرنس نا ساڑی مروک آتا خیرمقدم ئِ کرسا اوپارے کہ دا کانفرنس بھاز اہمیت نا حامل ئِ ہرا قومی شونداری نا مسختئِ دوئی کننگ نا چرجوئی ٹی قابل عمل راہ متعین کننگ اٹی مفید جوڑمریک۔ اوپارے کہ قومی واک انا غٹ عنصرآک اسہ ایلو تون گنڈوک ئُ اوفتا نیام اٹ ہم آہنگی نا کمک اٹ ہی قومی واک انا تصور پورو مننگ کیک۔ اوپارے کہ پاکستان قدرتی وسیلہ ورناورک فورس وسوگو دفاع نا حامل ملک اسے ولے داڑتون اوار اوار گڑاس ویل ہم مون تروک ئِ ہرافتا مون ئِ توننگ کن غٹ عنصرآتا نیام اٹ ہم آہنگی المی ئِ۔ اواومیت ظاہر کرے کہ قومی کانفرنس پاکستان ئِ مون تروک ویل آتا مون ئِ توننگ کن جامع لائحہ عمل نا تعین اٹی کمکار جوڑ مریک۔ داوخت آ ہائرایجوکیشن نا چیئرمین پروفیسر ڈاکٹرمختار احمد تینا تران اٹی پارے کہ شونداری کن اسیجائی مسخت و ولدا دا چرجوئی ٹی مربوط و ہم آہنگی اٹ کروک آک کوشست آک المی ئُ۔ کانفرنس نا افتتاحی دود اٹی وزیراعظم نا سلاہکار قومی سلامتی ناصر جنجوعہ، کیہی ملک آتاسفارتکار ، یونیورسٹی نا وائس چانسلر ، چاہندار تعلیم، سول سوسائٹی و کاروباری برادری نا نمائندہ و طالب علم آتا بھلو کچ اس ساڑی ئس۔
