ڈیہہ ٹی امن و شونہالی کن ڈیہہ نا ملک آتا نیام اٹ کمکاری المی ئِ، سرتاج عزیز
حکومت پائیدار شونداری نا دوئی کن وژن 2025ءنا رداٹ چندی گام گیج آتے چست کننگ ئِ، بنجائی وزیر موسمیاتی تبدیلی زاہد
اسلام آباد۔ 08دسمبر (اے پی پی) زرکاری بورڈ نا چیئرمین ڈاکٹر مفتاح اسماعیل پارینے کہ چین پاکستان اقتصادی راہداری ڈٹ (سی پیک) آن ڈیہہ نا ملک آتیٹی معاشی تعلقداریک ودرہ ہراڑآن شونداری و شونہالی ٹی ودکی مریک۔ ہر چار آ صوبہ غاتے سی پیک ڈٹ آن اسہ وڑنا وارخواہی دوبریک ہراڑآن شونہالی بریک وروزگار نا وارخواہی ودی مریک۔ داخیال آتا درشانی ئِ اوایس ڈی پی آئی ٹی 19می پائیدار شونداری نا بابت اڈہلوک کانفرنس آن تران کرسا کرے۔ اوپارے کہ ڈٹ انا پوروی آن چینی زرکارآتا کنڈآن ملک اٹی 150ارب ڈالر نا زرکاری بریک۔ اوپارے کہ ملک اٹی توانائی نا گرج آتے پورو کننگ کن تاپی و کاسا 1000 ڈٹ آتیا توجوہ تخنگا۔ اوپارے کہ داڈٹ اکن تربیت یافتہ افرادی واک انا گرج تمک۔اوپارے کہ حکومت صوبہ غاتانیام اٹ امتیاز ئِ چٹفنگ کن پرعزم ئِ و غٹ صوبہ غاتے شونداری نا اسہ وڑوارخواہی تننگ انگ ئِ۔ کانفرنس نا افتتاح آ وزیراعظم نا خصوصی کمکار خارجہ امور سرتاج عزیز پارے کہ ڈیہہ ٹی امن و شونہالی کن ڈیہہ نا ملک آتا نیام اٹ کمکاری المی ئِ۔ اوپارے کہ ہزاریہ شونداری ہدف آتا دوئی کن علاقائی و بین الاقوامی ملک آتا نیام اٹ اسہ ایلو تون کمکاری المی ئِ۔ کانفرنس نا کماشی ئِ کرسا بنجائی وزیر موسمیاتی تبدیلی زاہد حامد پارے کہ پائیدار شونداری نا دوئی کن حکومت وژن 2025ءنا رداٹ چندی گام گیج آتے چست کننگ ئِ۔
