اسلام آباد۔ 07دسمبر (اے پی پی) مسلم لیگ ن نا راہشون طلال چودھری پارینے کہ وزیراعظم نواز شریف آ کاغد آتا ٹکر آتے سرفسا سرفسا دوبہ خلوک آ عمران خان نا شاہدیک ہراد و، تحریک انصاف اینو عدالت آن مہلت خوائس و مہلت ہموک خواہرہ ہرافتے تون شاہدی ساڑی مفک۔ پاناما لیکس کیس انا سماعت آن گڈ سپریم کورٹ نا پیشن میڈیا تون ہیت وگپ کرسا اوپارے کہ تحریک انصاف پانامالیکس کیس اٹی کمیشن جوڑ کننگ نا بابت صلابت کن سپریم کورٹ آن وخت خواہسونے۔ عمران خان عدالت آن نرنگ اٹی ئِ وخت اس کہ شیر تینا موقف آ سلوک ئِ وخت اس کہ مخالف آک نرنگ نا کوشست کننگ ئُ۔ اوپارے کہ عمران خان پاکستان ئِ بند کننگ نا ہیت کریکہ و وزیراعظم ئِ اُراغا گدریفنگ نا ضد آ ئس۔ داسہ او تینٹ ہی نرنگ اٹی ئِ۔ اوپارے کہ نواز شریف تو سپریم کورٹ ئِ تلاشی تننگ کن تیار ئِ ولے داسہ عمران خان نرنگ اٹی ئِ۔ اوپارے کہ نواز شریف اسہ صنعت کار خاہوت اسے آن تعلق تخک، مریم نواز، حسن نواز و حسین نواز نا پیرہ بھلو صنعت کار اس ئس ہرانا شریداری شاہی خاہوت نا خلقت آتون ئس۔ اوپارے کہ پاناماکیس لیکس نافیصلہ بایدے زوت مرے، عمران خان نومبر اٹی سیاسی چوری مسوسس داسہ سپریم کورٹ آن ہم اودے مایوسی آن بیدس ہچ اس رسینگپک۔
