اسلام آباد۔ 07دسمبر (اے پی پی) پاکستان پوسکن آ امریکی انتظامیہ تون اواری اٹ کاریم کننگ نا خواہندار ئِ ، ڈیہہ و جہانی امن کن ہڑتوم آ ملک آتا تعلقداری اہم ئِ ، ہرافتا سوگوی کن کاریم پوسکن آ امریکی انتطامیہ ٹی ہم بایدے برجاسلے۔ داہیت ئِ وزیراعظم نا خصوصی کمکار امور خارجہ طارق فاطمی و امریکہ نا نائب وزیر خارجہ انٹونی بلنکن نا نیام اٹ اوڑدہی ٹی پاننگا۔ داوخت آامریکہ ٹی پاکستان نا سفیر جلیل عباس جیلانی ہم اوڑتون اوار ئس۔ طارق فاطمی ہرا اسہ ڈل اسے تون اوار دا دے تیٹی امریکہ نا دورہ غاٹی ئِ امریکہ نا ساڑی آ صدارتی گچین کاری نا بارواٹی وزیراعظم پاکستان محمد نواز شریف و پاکستانی الس نا کنڈآن نیک است خواہی تا کلہو ئِ ہم سرکرے ، طارق فاطمی نومبر اٹی مروک آ صدارتی گچین کاری تیٹی صدر گچین مروک آ ڈونلڈ ٹرمپ نا ٹیم اتون اوڑدہی کننگ اٹی ئِ۔ اوڑدہی ٹی ہڑتوم آ کنڈآتا تعلقداری تا جاچ ئِ ہلسا امن و سلامتی ، دفاع، انسداد دہشت گردی و اقتصادی کمکاری تا بشخ آتیٹی دوئی مروک آ سرسہبی تیا است جمی نا درشانی ئِ کننگا۔ بیان اٹی پاننگاکہ نائب وزیر خارجہ بلنکن ڈیہہ ٹی امن و سوگوی کن پاکستان نا کوشست آتا ستائِ کرسا تقریباََ چار دہائی تسکان اوغان پناہ گزین تا میزبانی کننگ و اوفتا اڈکننگ اٹی ودیکی نا ساڑی آ موکل تننگ آ اونا ستائِ کرے۔ اوڑدہی ٹی متنازع علاقہ کشمیر نا لین آف کنٹرول بھارت تون پاکستان نا ورکنگ باﺅنڈری آ ساڑی آ بے چیٹی تا معاملہ غاتیا ہم شرہ کننگا۔ پاکستانی عہدیدار ساڑی آ ہفتہ غاتیٹی بھارت نا کنڈآن سیز فائر نا خلاف ورزی و کنٹرول لین آ لس شاری تے نشانہ جوڑ کننگ نا واقعہ غاتیا امریکی نائب وزیر خارجہ ئِ معلومدار کرے۔ بلنکن دارداٹ امریکی موقف نا اعادہ ئِ کرسا پارے کہ سویلی ایشیا ٹی بے چیٹی تیٹی کمتی و ڈیہہ نا اِرا بھلا ملک آتا نیام اٹ خڑکی کمکاری نا گرج ئِ۔ اونا مستی پاننگ ئس کہ بھارت نا کنڈآن ایل اوسی نا پدریسہ خلاف ورزی کننگ انگ ئِ و کودک شاری تے نشانہ جوڑ کننگ انگ ئِ ۔ ملک آن دہشت گردی نا چٹفنگ کن پاکستان پرعزم ئِ و دہشت گردی نا برخلاف جنگ سرسہبی اٹ جاری ئِ۔ اوپارے کہ دہشت گردی نا برخلاف جنگ اٹی پاکستانی فوج انا 5ہزار ورناشہید مسنو۔ پاکستان نا قبائلی و سیمی علاقہ غاتیٹی 2لکھ فوجی آپریشن اٹی اختہ ئُ۔ پاکستان بھلو نہاد اس تسنے و داآپریشن نا بدولت پاکستان اٹی دہشت گردی ٹی کمتی واقع مس۔ پاکستان نیشنل ایکشن پلان آ عمل کننگ اٹی ئِ و مچ آ پاکستانی قوم دہشت گردی آن نجات کن متحد ئِ۔ کشمیر نا ویل انا ایسری کن پاکستا ن و بھارت ئِ مذاکرات کروئی مریک۔ مقبوضہ کشمیر اٹی داوخت آ آجوئی نا تحریک زور ہلنگ ئِ۔ پاکستان کشمیرنا ویل انا ایسری کن امریکی ثالثی نا خیرمقدم ئِ کرسا پارینے کہ کشمیرنا ویل انا ایسرصرف اقوام متحدہ نا قرارداد آک ئُ۔ کشمیرنا ویل انا ایسری آن ہی سویلی ایشیاٹی امن و سوگوی ممکن ئِ۔
