لین آف کنٹرول آ ہروڑنا خلاف ورزی نا دمدستی و گچین ورندی ئِ ایتر
راولپنڈی۔ 02دسمبر (اے پی پی) پاک فوج انا سروک جنرل قمر جاوید باجوہ لین آف کنٹرول آ تعینات فوجی ورناتے پارت تسنے کہ لین آف کنٹرول آ ہروڑنا خلاف ورزی آ دمدستی و گچین ورندی ایتر، بھارتی بیدادی نا مسخت مقبوضہ کشمیر آن دنیا نا توجوہ ئِ اسہ کنڈ کروئی ئِ۔ کشمیر نا ویل انا ایسر ہی ڈیہہ ٹی دیرپاامن نا ضمانت ئِ۔ او جمعہ آ 10کورہیڈکوارٹر و لین آف کنٹرول آ مورچہ غاتا دور ہ نا وخت آ تران کریکہ۔ پاک فوج انا شعبہ تعلقات عامہ(آئی ایس پی آر ) نا رداٹ آرمی چیف جنرل قمر جاوید باجوہ جمعہ آ 10 کورہیڈکوارٹراٹی اختہ ئُ دے گدریفے و لین آف کنٹرول آ مورچہ غاتا دورہ ئِ ہم کرے ہراڑے اودے بھارتی فوج انا کنڈآن بے خار سم کاری، ساڑی آ خلاف ورزی و لین آف کنٹرول نا جم سیکورٹی نا بابت سرجم بریفنگ تننگا۔ پاک فوج انا سروک جنرل قمر جاوید باجوہ پاک فوج انا آپریشنل تیاری و جنگ بندی نا معاہدہ ناخلاف ورزی آ پاک فوج انا پبی ورندی نا ستائِ کرسا پارت تس کہ لین آف کنٹرول آ ورناک ہمہ وخت چوکس و بڑزکو معیار ئِ برقرار تخر۔ جنرل قمر جاوید باجوہ تران کرسا پارے کہ بھارتی بیدادی نا مسخت مقبوضہ کشمیر اٹی کروک آ بیدادی آن جہانی برادری نا توجوہ ئِ اسہ کنڈ کروئی ئِ۔ اوپارے کہ کشمیر نا ویل انا ایسری ڈیہہ ٹی امن دیرپانا ضمانت ئِ ، اقوام متحدہ نا قرارداد و کشمیری الس نا است خواہی تارداٹ داویل بایدے ایسر مرے۔ پاک فوج انا سروک ہراتم 10کور آ سرمس تو کورکمانڈر لیفٹیننٹ جنرل ملک ظفر اقبال اونا خیر مقدم ئِ کرے۔
