اسلام آباد۔ 02دسمبر (اے پی پی) صدر مملکت ممنون حسین پارینے کہ بوسنیا و ہرزیگوینا تون چندی بشخ آتا ڈل آتا درشان کننگے، ہنداوڑ کمکاری نا پوسکن آ کسر آک ملنگرہ۔ صدر مملکت داہیت ئِ بوسنیا و ہرزیگوینا کن پندار پاکستانی سفیر لیفٹیننٹ جنرل (ر) سلیم نواز تون پارے ہراجمعہ آ ایوان صدر اٹی اوڑتون اوڑدہی کرے۔ صدر مملکت پوسکن آ سفیر ئِ اونا پوسکن آ زمواری تے سنبھالنگ آ مبارکبادی تس۔ اومستی پارے کہ ہڑتوم آ ملک آتے خڑک اتنگ کن اخلاص و خواری نا گرج ئِ، داڑکن المی ئِ کہ ہڑتوم آ کنڈآتا است خواہی نا وارخواہی پٹنگے۔ صدر مملکت پارے کہ پاکستان و بوسنیا نا نیام اٹ تعلیم، دودوربیدہ و ایلو بشخ آتیٹی ڈل آتا درشان آتیٹی بایدے ودیکی مرے۔ بوسنیا نا طالب علم آتے پاکستانی جامعہ غاتیٹی وظیفہ تننگے۔ صدر مملکت پارے کہ بوسنیا ئِ دامون ایمون نا ملک آتون واپار و برآمدات آتے کن بنجاءاس جوڑ کننگ مریک۔ صدر مملکت پندار سفیر کن نیک است خواہی تا درشانی ئِ کرے و اونا سرسہبی کن دعا کرے۔ پندار سفیر راہشونی و کمکاری آ صدر مملکت نا منت واری ئِ ادا کرے۔
