اسلام آباد۔ 30نومبر (اے پی پی) پاکستان مسلم لیگ (ن) نا سینیٹر لیفٹیننٹ جنرل (ر) عبدالقیوم پارینے کہ امن نا کسر آ چلینگ انگ کن اسہ ایلو تون کمک بھاز المی ئِ۔ ریڈیو پاکستان تون ہیت وگپ کرسا اوپارے کہ دنیا گلوبل ولیج اس جوڑ مسنے پیسہ و تعلقداری نا بنداو آ کاروبار کننگ انگ ئِ۔ ہرانا بھلا مثال بھارت نااوغانستان نا گل زمین ئِ کاریم اٹ اتسا بلوچستان ، کراچی و ایلو شارتیٹی دہشت گردی کننگ نا ئِ۔ اومثال اس ترسا پارے کہ کراچی نیول بیس یارڈ، کامرہ ایئر و آرمی پبلک اسکول جلہو آتیٹی اوغان شدت پسند دزگیر کننگار، سجفنگ نا ہیت اسے کہ اوغان شدت پسند آتے تربیت و پیسہ دیر تس داجلہو آتا فائدہ دیر ئِ مس ۔ جنرل (ر) عبدالقیوم پارے کہ لین آف کنٹرول ، ورکنگ باﺅنڈری و مقبوضہ کشمیر اٹی بھارتی بیدادی نا مطلب صرف کشمیر نا ویل آن دنیا نا توجوہ ئِ اسہ کنڈ کننگ و پاکستان آن بے چیٹی تے تہو ترسا دنیا نا ہمدردی ئِ دوئی کروئی ئِ۔ اوپارے کہ بھارت نا عیاری و مکاری نا پالیسی تیان اودے وخت اس ہم سرسہبی دوئی متنے و نہ ہی مریک۔ اوپارے کہ مسکوہی آرمی چیف جنرل راحیل ہم تینا آخریکو تران اٹی بھارت آ صفا کرینے کہ او ننا سگ انا الیسی ئِ نزوری تکپ اگہ او بیدادی ئِ ہلیتو تو اودے بھلو نسخان اس ہرفوئی تمک۔ سینیٹر عبدالقیوم پارے کہ بھارت ئِ کشمیر نا ویل انا ایسری کن مذاکرات نا میز آ بروئی تمک ہنداڑآن ہڑتوم آملک آتون ڈیہہ ٹی امن اڈ ہلنگ مریک۔
