کوئٹہ۔ 29نومبر (اے پی پی) پاکستان مسلم لیگ (ن) نا بنجائی سینئر نائب صدر و سینیٹ نا قائمہ کمیٹی بجلی و دیر انا چیئرمین سینیٹر سردار یعقوب خان ناصر پارینے کہ گوادر بندرگاہ آخبت اٹی بین الاقوامی صنعتی و واپاری بنجاءجوڑ مرسا مون آ بریک ہرا نہ صرف بلوچستان بلکن مچ آ پاکستان نا معاشی شونداری ٹی کلیدی کڑد ادا کیک، سی پیک نا دیکی روڈ آن چینی قافلہ غاتا پرامن و رکھ وڑاٹ گوادر بندرگاہ سرمننگ پرامن و شونہال بلوچستان نا علامت ئِ، پاک چین اقتصادی راہداری ڈٹ انا بنجائی شار گوادر نا الس ئِ تعلیم، جان جوڑی و روزگار و واپار نا وارخواہی فراوان کننگ کن بنجائی حکومت نا کمک اٹ ڈٹ آتیا کاریم ترندی اٹ جاری ئِ۔ گوادر نا طالب علم آتے فنی تعلیم نا آسراتی تا فراوانی کن ووکیشنل انسٹیٹیوٹ و گوادر یونیورسٹی نا اڈہلنگ زوت عمل اٹ اتنگک۔ داخیال آتا درشانی ئِ او سے شنبے آ”اے پی پی“ تون اسہ خصوصی انٹرویو اسے ٹی کرے۔ سینیٹر سردار یعقوب خان ناصر پارے کہ کاشغر آن گوادر اسکان اقتصادی راہداری نا جوڑ جاڑ پاک چین تعلقداری تے پوسکن آ جہت درستی راستی کرفینے، چین پاکستان نا واحد انگا سنگت ملک ئِ وخت اس کہ پاک چین سنگتی ڈیہہ ٹی اولیکو دے آن ہی مثال مسنے و چین آزمائش نا ہر ساہت اٹی پاکستان تون پبی تفینے، اوپارے کہ پاک چین اقتصادی راہداری ڈٹ آن بلوچستان اٹی امن ، سلامتی ، شونداری و شونہالی نا پوسکن آ کسرآک ملنگرہ و اقتصادی و راجی شونداری نا پوسکن آ دور انا بناءمریک۔ وزیراعلیٰ بلوچستان نواب ثناءاللہ خان زہری نا سروکی ٹی اڈ ہلوک مخلوط صوبائی حکومت پاک چین اقتصادی راہداری ڈٹ اٹی تینا کلیدی کڑد ئِ ادا کننگ ئِ و سی پیک ڈٹ انا بنداو گوادر نا شاری تے تعلیم ، جان جوڑی ، روزگار و واپار نا وارخواہی فراوان کننگ کن بنجائی حکومت نا کمک اٹ کیہی ڈٹ آتیا کاریم ترندی اٹ جاری ئِ وخت اس کہ گوادر نا طالب علم آتے فنی تعلیم نا آسراتی تا فراوانی کن ووکیشنل ٹریننگ انسٹیٹیوٹ و گوادر یونیورسٹی نا اڈتننگ ئِ زوت عمل اٹ اتنگک۔ اسہ سوج اسے نا ورندی ٹی اوپارے کہ پاک چین اقتصادی راہداری ٹی بلوچستان و گوادر بندرگاہ ئِ کلیدی حیثیت دوئی ارے، بندرگاہ نا کاریمی مننگ و چینی واپاری قافلہ نا گوادر آ بننگ آن بلوچستان اٹی درملکی زرکاری نا مون آ دننگ آن پاکستان شونداری نا پوسکن آ مزل آتے طے کیک۔ اوپارے کہ دا ڈٹ ڈیہہ ٹی گیم چینجر اسے نا حیثیت تخک ہنداخاطران گوادر بندرگاہ آن اولیکو واپاری قافلہ نا رادہ مننگ آن پاکستان و چین نا تاریخی سنگتی نا عظیم سفر نا اسہ پین سنگ میل اس عبور مسنے۔ اوپارے کہ سیاسی و عسکری سروک آتے کن غیر متزلزل عزم آن چنکو وخت اسے ٹی پاک چین اقتصادی راہداری ڈٹ حقیقت نا دروشم اس ہلکونے ہراڑآن زرکاری ٹی نمان ودکی و ہزار آ بے روزگار ورناتے روزگار نا وارخواہی دوبریک۔
