ننا سگ انا پالیسی ئِ نزوری سرپند کننگ بھارت کن خطرناک مریک، سویلی ایشیاءٹی دیر پاامن و شونداری کشمیر نا ویل انا ایسری آن بیدس مننگ کپک، تہہ نا و پیشن نا خلیس آتون مون تننگ کن کرپشن و انتہاپسندی نا چٹفنگ المی ئِ، سی پیک آن پاکستان ، چین ، نیامی ایشیاو ایلو ملک آتا تین پہ تینی کمک و شونہالی ئِ مون آ دننگک، سی پیک نا سفر نا بناءمسنے داسہ دادے ہچ گہس توننگ کپک
راولپنڈی۔ 29نومبر (اے پی پی) سبکدوش مروک آ بری فوج انا سروک جنرل راحیل شریف بھارت آ صفا کرینے کہ ننا سگ انا پالیسی ئِ نزوری سرپند کننگ تینٹ بھارت کن خطرناک مریک۔ سویلی ایشیاءٹی دیرپا امن و شونداری کشمیرنا ویل انا ایسری آن ممکن اف۔ تہہ نا و پیشن نا خلیس آتون مون تننگ کن کرپشن و انتہاءپسندی نا چٹفنگ المی ئِ۔ چین پاکستان اقتصادی راہداری (سی پیک) پاکستان ، چین ، نیامی ایشیاءو ایلو ملک آتا تین پہ تینی شونہالی ئِ مون آ دننگک، سی پیک نا سفرنا بناءمسنے دا سفر ئِ ہچ گہس توننگ کپک ، سی پیک دشمن نا کوشست آتے کروک آک ہم سی پیک نا سرسہبی تا بھرم آتیٹی اوار مریر ، اوغانستان اٹی پائیدارامن کن ننا مخلصانہ و سنجیدہ کوشست آتے یات تخنگے و سیاسی مفاہمت نا کمک اٹ اوغانستان اٹی امن نا اڈتننگ کن کوشست آتے کننگے، سیکورٹی نا پیچیدہ حالیت ، مون تروک چیلنج آک داسکان چٹتنو، ساڑی آ سال تا سرسہبی تا سوگوی کن شہید آتا قربانی تے ہچ ئُ دروشم اسے ٹی گیرام کننگپ، قوم و ادارہ غاک اسٹ مرسا حالیت آتون مون ایتر، او سے شنبے آ راولپنڈی ٹی ملازمت نا مدت ئِ پورو کننگ آن گڈ کمان تبدیلی نا دود آن تران کریکہ۔ اسپیکر قومی اسمبلی ایاز صادق، وزیر دفاع خواجہ آصف، وزیر سیفران لیفٹیننٹ جنرل (ر) عبدالقادر بلوچ ، وزیر مملکت اطلاعات و نشریات مریم اورنگزیب ، سلاہکار قومی سلامتی امور لیفٹیننٹ جنرل (ر) ناصر جنجوعہ ، چیئرمین جوائنٹ چیفس آف اسٹاف کمیٹی جنرل زبیر حیات آن بیدس ایلو پارلیمنٹ نا باسک ، اعلیٰ سول و فوجی کمامدار، درملکی مندوبین ، قومی و بین الاقوامی احوالکارآتا بھلو کچ اس ساڑی ئسر۔ جنرل راحیل شریف تینا تران اٹی پارے کہ بطور آرمی چیف ای قومی مفادآتے مون آتخاٹ، تینا و فوج انا توانائی مثبت وڑاٹ خڑچ کریٹ، ہمووخت آ قوم انا پورو کمک دوئی سلیس ہراڑآقوم و پاک فوج انا منت وار اُٹ۔ اوپارے کہ پاک فوج اتون ملک و ملت نا سوگو رشتہ سلیس و اومیت ئِ کہ آخبت ٹی پین سوگو مریک۔ اوپارے کہ پاک فوج ہمیشہ قوم انا پت آ پورو سلک۔ اوپارے کہ پاک فوج انا سرسہبی تیٹی ایف سی ، رینجرز، پولیس، لیویز و ایلو سیکورٹی فورس آتا قربانیک اوار ۔ اوپارے کہ آپریشن ضرب عضب اٹی دوئی کروک آ سرسہبیک بھلو مثال اسے ئُ۔ اوپارے کہ لمہ وطن نا دفاع کن پاک فوج اتون اوار اوار شاری، نیاڑی ، چناو بزرگ آک ہم قربانی تسر ، نن شہید آتے خراج عقیدت و سلام پیش کینہ۔ اوپارے کہ وطن عزیز نا برخلاف ناپاک عزم آتے سرسہب مننگ کن الیپنہ، ملک انا دفاع ئِ ناقابل تسخیر جوڑ کرینن۔ اوپارے کہ دہشت گردی نا برخلاف بے مثل سرسہبی دوئی کرینن، بلوچستان و کراچی ٹی امن نا اڈتننگ ، آپریشن ضرب عضب نا سرسہبی تا بھرم آک صفا نظر بننگ ئُ۔ اوبنجاءو صوبائی حکومت، سیاسی سروک آتا منت واری ئِ ادا کرسا پارے کہ ننا سرسہب کوشست آک اوغٹ انا اوارمننگ آن پورو مسر، کنے داہیت انا ہم خوشی ئِ کہ ننا داغٹ کوشست آتے رائے عامہ نا ہم پورو پت سلیس، قومی امنائی ٹی میڈیا نا مثبت کڑد آ صحافتی حلقہ غاتا منت وار اُٹ۔ اوپارے کہ ایئر فورس و پاکستان نیوی نا ہم منت وار اٹ، ننا سرسہبی تیٹی اوفتا کمک ہم مس۔ سلہہ بند فوج انا تین پہ تینی رابطہ، کمک ننا بیش قیمت میرات ئِ ہراڑآننے فخر ئِ۔ اوپارے کہ سیکورٹی نا پیچیدہ حالیت، مون تروک چیلنج آک داسکان چٹتنو، ساڑی آ سال تا سرسہبی تا سوگوی کن شہید آتا قربانی تے ہچ ئُ دروشم اسے ٹی گیرام کننگپ، قوم و ادارہ غاک اسٹ مرسا حالیت آتون مون ایتر، تہہ نا و پیشن نا خلیس آتون مون تننگ کن کرپشن و انتہاءپسندی نا چٹفنگ المی ئِ ، قومی ایکشن پلان آ اونا روح انا رداٹ عمل درآمد ئِ باوری جوڑ کننگے۔ اوپارے کہ پورو امن نادوئی کن ننا سفر جاری ئِ، ننا مزل مر اف، تہہ و پیشن نا خلیس آتا پورو سدباب اسکان اختہ عمل سلنہ۔ اوپارے کہ بدقسمتی اٹ ساڑی آ توتیٹی بھارتی مقبوضہ کشمیر نا تہٹی ریاستی دہشت گردی و بیدادی نا سیبو ئِ ہلنگ نا بناءکرینے ہراڑآن ڈیہہ نا امن خطرہ ٹی تمانے،۔ بھارت آ صفا کننگ خوانہ کہ پاکستان نا سگ انا پالیسی ئِ نزوری سرپند کننگ تینٹ بھارت کن خطرناک مریک۔ اوپارے کہ سویلی ایشیاٹی دیرپا امن و شونداری کن کشمیر نا ویل انا ایسری المی ئِ داڑکن جہانی برادری ئِ خصوصی توجوہ تروئی مریک۔ جنرل راحیل شریف پارے کہ نن اوغانستان اٹی امن نا اڈتننگ کن سنجیدہ و مخلصانہ کوشست کرینن، اوغانستان اٹی امن نا اڈتننگ کن الم ئِ کہ سیاسی مفاہمت کن کاریم کننگے۔ امن کن ننا کوشست و خلوص نا مچ آدنیا ستائِ کرینے، نن داڑآ جہانی برادری نا منت واراُن۔ اوپارے کہ ڈیہہ ٹی امن و شونہالی نا ضمانت سی پیک ئِ، دا ڈٹ چین، پاکستان، نیامی ایشیاءو ایلو ملک آتا تین پہ تینی کمک و شونہالی ئِ مون آ دیک، گوادر آن اولیکو قافلہ نا روانگی داہیت انا ثبوت ئِ کہ دا سفر داسہ سلپک، وخت بسنے کہ سی پیک نا دشمنی ٹی کوشست کروک آک ہم دانا سرسہبی نا بھرم آتیٹی اوار مریر۔ جنرل راحیل شریف پارے کہ اینو پاک فوج آن رخصت مرسا کنے فخر ئِ کہ کنا زند اسہ عظیم ئُ مسخت اسے کن صرف مسنے ، دا ادارہ نا آخبت روشنا و تابناک ئِ ۔ اوپارے کہ نن ادارہ غاتا سوگوی آ باور کینہ، دارداٹ ہمیش کوشست مسنے کہ غٹ ادارہ غاک اواری اٹ ملکی سلامتی و سوگوی کن کاریم کیر ، پاک فوج سوگوو بڑزکو روایت آتا حامل ئِ، کمانڈر نا تبدیلی اعلی اقدار نا تسلسل نا علامت ئِ، پاک فوج خوش قسمتی اٹ اعلیٰ پیشہ وارانہ مہارت و سوگو واک فیصلہ نا حامل ئِ۔ اوپارے کہ پاک فوج اعلیٰ پیشہ وارانہ معیار ئِ ہروڑاٹ برقرار ، قربانی نا روایت و جوزہ تون وطن نا خذمت مقدم تخک، لائخی تیا پورو پت اللہ نا نصرت آ یخین ئِ، انشاءاللہ فتح و کامرانی ننا مقدر جوڑ مریک۔
