اسلام آباد۔ 25نومبر(اے پی پی) سینیٹ فوجداری کانود(ترمیمی) بل 2016ءنا منظوری ئِ تس۔ جمعہ آ ایوان بالا نا دیوان اٹی وزیر برائے داخلہ بلیغ الرحمان دا بابت آن تحریک پیش کرے کہ فوجداری ترمیمی بل 2016ءکمیٹی نا اڈ تروک آ دروشم اٹی غور اٹی اتنگے۔ بل انا سرجم آتیان معلومدار کرسا اوپارے کہ دا بل اٹی غلط معلومداری تننگ نا سزا تے ودفنگانے و خاص وڑاٹ ہموغلط معلومداری ہرافتے آن کس اسے پاہو یا عمر قید مننگ کیک داکان بیدس مذہبی و فرقہ وارانہ بنداو آ جوزہ غاتے بڑزکننگ، چناتا جبری برام کون آ ڈوہ تے ہم داٹی اوارکننگانے۔ جبری برام آ مست سزا ہفت سال ئس ہرادے ودفسا داسہ دہ سال کننگ نا سلاہ تننگانے۔ داکان بیدس پولیس افسر آتا فرض آتیٹی ہم اوار کننگانے کہ او فرقہ وارانہ یا مذہبی بنداو آ منافرت تالان کننگ ناعمل ئِ تورینہ۔ دا چرجوئی ٹی سزاٹی ہم ودکی کننگانے۔ اوپارے کہ حکم آتے من پننگ آ داسہ جرمانہ غاتون اوار اوار مسہ سال سزاہم اوار کننگانے۔ کانود شہادت اٹی ہم ترمیم سلاہ کننگانے و انسداد دہشت گردی ایکٹ اٹی اسہ پین سیکشن اس ہم اوار کننگانے ۔ ہرانا رداٹ کسس کس اسے نا خون ئِ کیک چائے دا مذہبی بنداو آ مرے یا پین بنداو اسے آ تو داڑکن ہم ودکی سزاہم سلاہ کننگانے۔ دامعاملہ غا سینیٹر طاہر حسین مشہدی و سینیٹر رحمان ملک ہم درشانِ خیال کرے۔ اوکان گڈ چیئرمین بل ئِ شق وار منظوری کن ایوان اٹی پیش کرے ہرادے امنائی اٹ منظور کننگا۔
