کانفرنس نا میزبانی اقوام متحدہ نا سیکرٹری جنرل و ترکمانستان اسیجائی وڑاٹ کننگ ئُ
اسلام آباد۔ 24نومبر(اے پی پی) وزیراعظم محمد نواز شریف ترکمانستان نا صدر نا سلہ غا اینو جمعہ آ اِرادے ئی دورہ غا ترکمانستان آ رادہ مریک۔ او پاکستانی ڈل انا سروکی ئِ کرسا اقوام متحدہ نا رداٹ اشک آباد اٹی ”پائیدار ٹرانسپورٹ نا بارواٹی اولیکو جہانی کانفرنس “اٹی شرکت کیک۔ ترجمان دفترخارجہ نا کنڈآن جاری بیان نارداٹ اقوام متحدہ نا سیکرٹری جنرل بان کی مون و ترکمانستان دا کانفرنس نا اسیجائی میزبانی ئِ کننگ ئُ ہراٹی کم و وَد 1500 شرکاءشریک مریرہ ہرافتے ٹی سروک مملکت و حکومت، وزراءنجی بشخ انا سی ای اوز، سول سوسائٹی نا راہشون و اقوام متحدہ نا عہدیدار آک اوار ئُ۔ کانفرنس اٹی پائیدار شونداری کن 2030ءایجنڈہ نا دوئی نا بابت پائیدار ٹرانسپورٹ نا مون آ دننگ و کڑد آ ہیت وگپ مریک۔ پاکستان مواصلاتی رابطہ غاتے استوار کرسا نیامی ایشیائی ریاست آتون گچین رابطہ غاتا خواہندار ئِ۔ دا رابطہ غاک واپاری و اقتصادی تعلقداری ، السی رابطہ و سیل و سوات نا وارخواہی تیان استفادہ کننگ کن سازگار مریک۔ پاکستان و چین گوادر و کراچی ٹی تینا بندرگاہ تے گچین مواصلاتی رابطہ غاتا فراوانی کن پاک چین اقتصادی راہداری نا بناکرینے۔ خشکی ٹی تموک نیامی ایشیائی ریاست آک کراچی و گوادر اٹی پاکستان نا بندرگاہ تسکان رسینگ کن ریل و شاہراتی ٹرانسپورٹ نا کسرتے کاریم اٹ اتنگ کیرہ۔ وزیراعظم محمد نواز شریف تینا دورہ نا وخت آ ترکمانستان نا صدر قربان علی بردی محمدوف تون ہم ہڑتوم آ کنڈآتیا اوڑدہی کیک۔ دا اوڑدہی ترکمانستان نا وزیراعظم نا 2015ءٹی و ترکمانستان نا صدر نا مارچ 2016ءٹی پاکستان نا دورہ غاتیٹی کروک آ فیصلہ غاتا جاچ ئِ ہلنگ نا ہم موقع فراوان کیک۔ داکان بیدس ہڑتوم آ ملک آتا سروکی ئِ تین پہ تینی است خواہی نا ہڑتوم آ کنڈآتا علاقائی و بین الاقوامی معاملہ غاتیا درشان خیال نا ہم موقع دُو بریک۔
