اسلام آباد۔ 24نومبر (اے پی پی) وزیر مملکت دیر و بجلی عابد شیرعلی پارینے کہ اگہ خیبر پختونخوا نا حکومت پشاور و نوشہرہ تون اوار ایلو شار تیٹی گریڈ اسٹیشن آتے کن بنجاءنا کنڈآن ادائیگی تا باوجود ڈغار دوئی کرسا تفک تو 2017ءٹی ملک اٹی بجلی نا حالیت آک گچین ولے او علاقہ غاتیٹی ویل آک مریرہ، نن تینا وڑاٹ چکدرہ گریڈ اسٹیشن کن حکم امتناعی ئِ چٹفین۔ پنچ شنبے آ قومی اسمبلی ٹی وقفہ سوج آتا وخت مسرت احمد زیب نا سوج انا ورندی ٹی عابد شیر علی پارے کہ چکدرہ کن 54کروڑ روپئی حکومت پاکستان تسنے، بھلو کاریم اس مسنے۔ چکدرہ نا گریڈ اسٹیشن ہراوخت اسکان جوڑ مفک بجلی نا ویل مریک۔ اگہ صوبائی حکومت بروخت ادائیگی نا باوجود ڈغار ہلککہ تو اینو دا کاریم پورو مسکہ۔ 2017ءٹی مالاکنڈ، سوات و ایلو علاقہ غاتیٹی اوورلوڈنگ نا ویل چکدرہ گریڈ اسٹیشن آن ایسر مریک۔ اوپارے کہ نن اونا حکم امتناعی ئِ چٹفین۔ کاریم ئِ داسہ ترندی اٹ پورو کننگ اُن۔ طے شدہ وخت آن منہ تو مست اودے پورو کینہ۔ اوپارے کہ نن ٹرانسفر آتے اپ گریڈکننگ اُن۔ 2017ءٹی دا معاملہ ایسر مریک ولے کے پی کے ٹی دا ویل آک سلرہ۔ حکومت کے پی کے کمک کپننگ ئِ۔ نوشہرہ ، پشاور تون اوار مسہ اہم انگا جاگہ غاتیا اگہ ڈغار حکومت کے پی کے ہلتو تتو تو دا معاملہ سلک۔ نن اونا ڈغار کن پیسہ ہم تسونن۔ تعلقدار قائمہ کمیٹی ہم داڑکن کمک کے۔ تحریک انصاف نا باسک سراج محمد خان پارینے کہ خیبر پختونخوا نا صوبائی حکومت گریڈ اسٹیشن آتے کن ڈغار نا دوئی ٹی سست روی نا درشانی ئِ کننگ ئِ۔ اوپارے کہ وزیر مملکت دیر و بجلی نا ہیت راست ئِ ، صوبائی حکومت ڈغار آتا دوئی نامعاملہ ٹی سست ئِ۔
