بین الاقوامی برادری بھارت نا کنڈآن دانستہ وڑاٹ شاری تے نشانہ جوڑ کننگ و ودوک آ تپاخت آتا نوٹس ئِ ہلے و لین آف کنٹرول آ بگڑینگوک آ سیکورٹی نا حالیت آتا چٹفنگ اٹی تینا فعال کڑد ئِ ادا کے
اسلام آباد۔ 24نومبر (اے پی پی ) پاکستان مقبوضہ کشمیر نا الس نا روا آجوئی نا جہد کن تینا اخلاقی ، سیاسی و سفارتی مخ تفیئِ برجاءتخنگ نا عزم انا اعادہ کرسا بین الاقوامی برادری آ زورشاغانے کہ او بھارت نا کنڈآن دانستہ وڑاٹ شاری تے نشانہ جوڑ کننگ و ودوک آ تپاخت آتا نوٹس ئِ ہلے و لین آف کنٹرول آ بگڑینگوک آ سیکورٹی نا حالیت آتا چٹفنگ اٹی تینا فعال کڑد ئِ ادا کے۔ داہیت انا درشانی ئِ پنچ شنبے آ داڑے وزیراعظم محمد نواز شریف نا کماشی ٹی دیوان اٹی کننگا ہراٹی بھارتی سیکورٹی فورس آتا کنڈآن وادی نیلم نا خڑک مسافر بس آ خون ریز جلہو آن گڈ ودی مروک آ حالیت آتا جاچ ئِ ہلنگا۔ دیوان اٹی بھارتی سیکورٹی فورس آتا کنڈآن پدریسہ بلااشتعال سم کاری نا رداٹ لین آف کنٹرول تون حالیت آتیا سجفنگا۔ وزیراعظم نا سلاہکار خارجہ امور سرتاج عزیز، ڈی جی آئی ایس آئی لیفٹیننٹ جنرل رضوان اختر، وزیراعظم نا خصوصی کمکار طارق فاطمی و قومی سلامتی نا سلاہکار لیفٹیننٹ جنرل (ر) ناصر خان جنجوعہ خاص کر 23نومبر 2016ءآ دھنیال سیکٹر اٹی بھارتی کوزہ گر فوج آتا کنڈآن سیز فائر نا بلااشتعال خلاف ورزی تیان گڈ لین آف کنٹرول تون ساڑی آ حالیت آتیا وزیراعظم ئِ بریفنگ تس۔ داواقعہ ٹی بھارتی فوج انا کنڈآن دانستہ وڑاٹ اسہ سویلین بس و اوکان گڈ ٹھپی تے اتنگ کن ہنوک آ ایمبولینس آتے نشانہ جوڑ کننگا۔ دیوان اٹی بس آ جلہو نا ترندی اٹ مذمت ئِ کرسا بھارتی مقبوضہ جموں وکشمیر نا الس نا اقوام متحدہ نا سلامتی کونسل نا قرارداد آتارداٹ حق خودارادیت نا دوئی کن اوفتا رواجہد کن سیاسی ، اخلاقی و سفارتی مخ تفی نا اعادہ کننگا۔ دیوان اٹی بین الاقوامی برادری آ زورشاغنگاکہ او شاری تے رزاک اٹ نشانہ جوڑ کننگ و ودوک آ سویلین جانی نسخان نا نوٹس ئِ ہلے و بھارت نا کنڈآن دانستہ وڑاٹ بے چیٹی ٹی ودکی نا سوب لین آف کنٹرول آسلامتی نا بگڑینگوک آ حالیت آتے مر کننگ اٹی تینا سرگرم کڑد ئِ اداکے۔ دیوان پاکستان نا سلہہ بند فوج انا ورناتے زبردست خراج عقیدت پیش کرے ہراک تدوک آ دے لمہ وطن نا رکھ ئِ کرسا تینا جان تے قربان کریر۔ دیوان ہٹ دھرمی تون ایمبولینس ئِ نشانہ جوڑ کننگ آ افسوز نا درشانی ئِ کرے ہرا بس آ جلہو نا زہمی تا امداد کن ہناکہ۔ دا بین الاقوامی انسانی کانود نا خلاف ورزی ئِ ۔ دیوان اٹی اتفاق خننگاکہ بھارت مقبوضہ کشمیر اٹی بھارتی سیکورٹی فوج اناکنڈآن بے گناہ و کودک کشمیری تا برخلاف انسانی حق انا صفائُ خلاف ورزی، لس خون و بیدادی آن بین الاقوامی برادری نا توجوہ ئِ اسہ کنڈ کننگ نا دانستہ کوشست کننگ ئِ ۔ بالعموم دنیا و خاص کر بھارت ئِ معلوم مرے کہ پاکستانی قوم تینا کشمیری ایلم تے وخت اس ہم الیپسہ و اوفتا منصفانہ و اقوام متحدہ نا مینڈیٹ نا رداٹ آجوئی نا جہد کن تینا مخ تفی ئِ برجاتخک۔ داوخت آ وزیراعظم محمد نواز شریف پارے کہ پاکستان لین آف کنٹرول تون بھارتی سیکورٹی فورس آتا کنڈآن سیز فائر نا پدریسہ خلاف ورزی تا باوجود بے کچ ضبط انا درشانی ئِ کرینے۔ اوپارے کہ نن بے گناہ شاری خاص وڑاٹ چناونیاڑی، ایمبولینس و سویلین ٹرانسپورٹ ئِ دانستہ وڑاٹ نشانہ جوڑ کننگ ئِ ہردروشم اٹ سگپنہ۔ وزیراعظم پارے کہ کشمیر تقسیم ہند انا بے پورو ایجنڈہ ئِ ۔ نن تینا کشمیری ایلم تا آجوئی نا جہد آن وخت اس ہم دستبردار مفنہ۔ دیوان اٹی وزیراعظم نا سلاہکار خارجہ امور سرتاج عزیز ، وزیراعظم نا خصوصی کمکار طارق فاطمی، قومی سلامتی نا سلاہکار لیفٹیننٹ جنرل (ر) ناصر خان جنجوعہ ، ڈی جی آئی ایس آئی لیفٹیننٹ جنرل رضوان اختر، خارجہ سیکرٹری اعزاز احمد چوہدری و ایلو سینئر سرکاری کمامدار آک ساڑی ئسر۔
