اسلام آباد۔ 24نومبر (اے پی پی) صدر مملکت ممنون حسین پارینے کہ ملک انا دفاع سوگو دوتیٹی ئِ، ننا قوم و سلہہ بند فوج دشمن نا ہروڑنا جلہو نا ورندی ئِ تننگ کن ہروخت تیار ئُ۔ اوداہیت ئِ چیئرمین جوائنٹ چیفس آف اسٹاف کمیٹی جنرل راشدمحمود تون ہیت وگپ کرسا پارے ہراپنچ شنبے آ ایوان صدر اٹی اوڑتون سپاروکی اوڑدہی کرے۔ صدر مملکت جنرل راشد محمود نا خذمت و ”آپریشن ضرب عضب“ نا سرسہبی ٹی اونا کوشست آتا ستائِ کرے۔ اوپارے کہ جنرل راشد محمود اسہ سچا و پیشہ ورانہ سپاہی اسے و اونا قائدانہ لائخی تا سوب سلہہ بند فوج انا مہارت و کسبی لائخی تیٹی ودکی مسنے۔ صدر پارے کہ پاکستان نا سلہہ بند فوج دنیا نا گچین فوج آتیان ئِ و او ہروڑنا ناگہانی آفت نا بھاز دلیری و جوان مردی اٹ مقابلہ ئِ کرینو۔ جنرل راشد محمود تینا مدت نا وخت صدر مملکت نا کمکاری و راہشونی آ اونا منت واری ئِ ادا کرے۔
