اسلام آباد ۔ 23نومبر (اے پی پی) قومی اسمبلی نا کمیٹی دفاع نا چیئرمین شیخ روحیل اصغر پارینے کہ پاکستان میزائل و روایتی سلہہ غاتا ٹیکنالوجی ٹی بھارت آن کیہی گنا مون آٹی ئِ۔ احوالکار آتون ہیت وگپ کرسا اوپارے کہ پاکستان اسہ پرامن ئُ ملک اسے و دا سلہہ غاتا رُم اٹی اوار مننگ نا خواہش مند اف۔ ولے ڈیہہ نا حالیت آتے مون آ تخسا تینا دفاع نا حق ئِ رکھوک تخک۔ شیخ روحیل اصغر بھارت نا کنڈآن تدوک آ دے کروک آ پرتھوی میزائل آزموندہ نا بابت پارے کہ ہندوستان اخس کہ آزموندہ کے او داہیت آن باخبر ئِ کہ پاکستان میزائل و روایتی سلہہ غاتا ٹیکنالوجی ٹی بھارت آن کیہی گنامون آٹی ئِ و دا کریڈٹ پاکستان نا سائنسدان و انجینئر آتے کاہک ہراک کچ اٹنگا وسیلہ غاتا باوجود ملکی دفاع کن پوسکن انگا ٹیکنالوجی ئِ تخلیق کرینو ہرانا امنائی ئِ جہانی کہول آ ہم کننگک۔ اوغانستان اٹی امن نا اڈتننگ نا بابت چست کروک آ سوج انا ورندی ئِ ترسا اوپارے کہ اوغانستان نا تہہ ناحالیت آتے ہرسا معلوم مریک کہ ہموڑے ہمووخت اسکان امن نا اڈتننگ ممکن اف ہراوخت اسکان امریکہ خواپ۔ اوپارے کہ امریکی میرین نا اوغانستان اٹی ساڑی گری آن دا تاثر ملک کہ او اوغانستان اٹی امن نا اڈتننگ آن زیات ڈیہہ نا نظر تخنگ اٹی است خواہی تخک۔ شیخ روحیل پارے کہ پاکستان ئِ بایدے مرے کہ او تینا تہہ نا حالیت آتا کنڈآ توجوہ ایتے انتئے کہ ساڑی آ حکومت نا گچین پالیسی تا بدولت شونداری نامزل ترندی اٹ طے کننگ ئِ و داسفر بایدے برجاسلے۔
