اسلام آباد۔ 23نومبر (اے پی پی) پاکستان کانڑ کنی ، توانائی نا پیداوار تون اوار ایلو کیہی بشخ آتیٹی یوکرین نا آزموندہ غاتیان استفادہ نا کمک اٹ بشخ جاتی شونداری ٹی کمک دوئی کننگ کیک۔ یوکرین نا سفیر ولادی میر لیکموف پارینے کہ پاک یوکرین ہڑتوم آ کنڈآتا واپار مسکوہی مالی سال 2015-16ءنا وخت آ 110 ملین ڈالر مسنے ہرا اونا کچ آن کم ئِ۔ اوپارے کہ پاکستان کیہی بشخ آتیٹی یوکرین نا آزموندہ و ٹیکنالوجی نا گدریفنگ نا کمک اٹ استفادہ کننگ کیک۔ اوپارے کہ ہڑتوم آ ملک آتا تین پہ تینی واپار اٹی ودکی نا بھلو گمان اس ساڑی ارے۔ مسکوہی مالی سال نا وخت آ پاکستان یوکرین ئِ 39.45ملین ڈالر نا برآمدات وخت اس کہ یوکرین آن 70.34ملین ڈالر نا درآمدات کریسس۔ اوپاکستانی برآمد کنندگان آتیا زورشاغا کہ او یوکرینی منڈی نا گرج آتے مون آ تخسا مصنوعات آتا تیاری و برآمدآ توجوہ تخے ہراڑآن ہڑتوم آ کنڈآتا واپار ئِ ودفنگ اٹی کمک رسینگک۔
