راولپنڈی۔ 23نومبر (اے پی پی) بھارتی فوج وادی نیلم اٹی لین آف کنٹرول نا خڑک سویلین مسافر بس و ایمبولینس ئِ نشانہ جوڑ کریر ہراٹی بس اٹی سوار 7مسافر تپاخت و 7ٹھپی مسر۔ چارشنبے آ آئی ایس پی آر نا کنڈآن جاری بیان نا رداٹ بس و ایمبولینس ئِ لین آف کنٹرول آ دھنیال نا خلق انا خڑک آ نشانہ جوڑ کننگا۔ دا ایمبولینس بس انا ٹھپی مسافر تا طبی امداد و تپاخت کروک آتا میت آتے اتنگ کن ہموڑے سرمسوسس۔ بھارتی فوج پدریسہ سیز فائر نا خلاف ورزی ئِ کننگ ئِ وخت اس کہ مقبوضہ کشمیر نا الس آ بدترین بیدادی کننگ انگ ئِ۔ ایمبولینس ئِ دانستہ وڑاٹ نشانہ جوڑ کرسا بھارتی فوج اسہ وار ولدا انسانی حق انا خلاف ورزی نا بدترین مثال اس اِلا۔ داکان بیدس بھارتی فوج شاہ کوٹ، جور، بٹل ، کریلہ، باغ، باگسر ، ہاٹ سپرنگز سیکٹر اٹی لین آف کنٹرول آ بلااشتعال سم کاری و گولہ باری کرے ہراٹی شاری آبادی ئِ نشانہ جوڑ کننگا۔ پاکستانی فوج بھارتی چوکی تے نشانہ جوڑ کننگ ئِ۔ ہراسیکٹر آتیٹی بھارتی فوج شاری آبادی تے نشانہ جوڑ کننگ ئِ ہموڑے سم کاری نا شدید تبادلہ جاری ئِ۔
