اسلام آباد۔ 22نومبر (اے پی پی) پاکستان مسلم لیگ (ن) نا راہشون، باسک قومی اسمبلی میجر (ر) طاہر اقبال پارینے کہ قطبی وزیرستان نا عارضی وڑاٹ بے اُرا مروک آ بندغ آتا بحالی نا کاریم بروک آ 6آن 8تو اٹی پورو کننگک ۔احوالکار آتون ہیت وگپ کرسا اوپارے کہ پاکستان مسلم لیگ (ن) نا حکومت نا اقتدار اٹی بننگ نا وخت ملک دہشت گردی نا پلویڑاٹی ئس۔ حکومت و ساڑی آ آرمی چیف جنرل راحیل شریف نا سروکی ٹی فوج قطبی وزیرستان و فاٹا نا علاقہ غاتیٹی آپریشن ضرب عضب نا بنائِ کریر و آپریشن ئِ سرسہب جوڑ کننگ کن ہموجاگہ نا ہندی بندغ آتے ایلو علاقہ غاتیٹی گدریفیر ہراکہ بھاز مشکل ئُ کاریم اس ئس۔ میجر طاہر پارے کہ جنرل راحیل شریف نا سروکی ٹی پاک فوج ہندا علاقہ غاتیان ہزار آ شدت پسند آتے اوفتا کروک نا سزا تس و دا علاقہ غاتیٹی بمب، خودکش جیکٹ جوڑ کروک آ سد آ فیکٹری و سلہہ ڈپو تے بھس کرے ہرانا سوب اینو مچ آ ملک اٹی 90درسد امن مسنے۔ اوپارے کہ سرسہب آپریشن ضرب عضب نا مچ آ دنیا ٹی ستائِ کننگ انگ ئِ۔ باسک قومی اسمبلی پارے کہ سرسہب آپریشن ئِ ہرسا دنیا نا کیہی ملک آک داسہ خوارہ کہ او ہم تینا فوج انا تربیت ئِ ہم پاک فوج انا وڑاٹ کیر۔ آئی ڈی پی تا بحالی نا بابت چست کروک آ سوج انا ورندی ئِ ترسا اوپارے کہ پاکستان مسلم لیگ (ن) و پاکستان نا فوج انا اسیجائی کوشست آتیان فاٹا و قطبی وزیرستان نا آپریشن والا علاقہ غاتیٹی روڈ، اسکول و ہسپتال آتون اوار انفراسٹرکچر نا کاریم بھلو حد اسسکان پورو کننگ آن گڈ ہزار آ زہمی تے پدی اوفتا اُراتیا گدریفنگانے و ایلو علاقہ غاتیٹی بحالی نا کاریم ترندی اٹ جاری ئِ۔
