اسلام آباد نا سرکاری و نجی اسکول آتیٹی منشیات نا ودوک آ رجحان نا رپورٹ درست اف،
اسلام آباد۔ 22نومبر (اے پی پی) وزیر مملکت کیڈ ڈاکٹر طارق فضل چوہدری پارینے کہ اسلام آباد نا سرکاری و نجی اسکول آتیٹی منشیات نا ودوک آ رجحان نا رپورٹ درست اف، اسلام آباد نا 425تعلیمی ادارہ غاتیان ہچ ئُ دُنو رپورٹ اس بتنے ، دابارواٹی ہرارپورٹ نا ذکر ئِ او اسہ این جی او سے نا ئِ ، اودے مسترد کینہ اونا برخلاف کانودی کارروائی کننگک پرائیویٹ اسکول آتا بست وبند حکومت تون اف، دابارواٹی ہچ اس پاننگ مفک۔ سے شنبے آ قومی اسمبلی ٹی آسیہ نازتنولی نا اسلام آباد نا سرکاری و نجی اسکول آتیٹی طالب علم آتیٹی منشیات نا ودوک آ رجحان آن بابت توجوہ مبذول نوٹس نا ورندی ئِ ترسا وزیر مملکت ڈاکٹر طارق فضل چوہدری پارے کہ دا توجوہ مبذول نوٹس اسہ این جی او نا رپورٹ اسے آ مبنی ئِ۔ اوٹی بیان کروک حساب وکتاب درست اف۔ اسلام آباد نا 425تعلیمی ادارہ غاتیٹی داوڑنا ہچ ئُ رپورٹ اس بتنے۔ پرائیویٹ اسکول آتا بست وبند حکومت تون اف۔اوفتا بارواٹی نن ہچ اس پاننگ کپنہ۔ توجوہ مبذول نوٹس آ آسیہ نازتنولی ، نگہت پروین میر، شائستہ پرویز ملک و شکیلہ لقمان نا سوج آتا ورندی ٹی وزیر مملکت ڈاکٹر طارق فضل چوہدری پارے کہ این جی اوو احوالکار آتے دا بابابت زمواری نا درشانی ئِ بایدے کروئی مرے و غیر مصدقہ خبر آتے شینک کروئی مف۔ اسہ سوج اسے ناورندی ٹی اوپارے کہ نن دا این جی او نا رپورٹ ئِ مسترد کینہ اونا برخلاف کانودی کارروائی کننگک۔
