اسلام آباد۔ 22نومبر (اے پی پی) بنجائی وزیر جہاز رانی و بندرگاہیں سینیٹر میر حاصل خان بزنجو پارینے کہ جنرل راحیل شریف نا بطور کمانڈر افواج پاکستان دہشت گردی نا چٹفنگ اٹی کڑد ستاکڑزک، وزیراعظم مرے، آرمی چیف یا چیف جسٹس آف پاکستان مرے غٹ ئِ تینا عہدہ غاتا آئینی مدت ئِ پورو کروئی مرے داڑآن ادارہ غاک سوگو مریرہ۔ سے شنبے آ پارلیمنٹ ہاﺅس نا پیشن میڈیا تون ہیت وگپ کرسا بنجائی وزیر میر حاصل خان بزنجو پارے کہ آرمی چیف نا کنڈآن ملازمت اٹی ودیکی ہلپننگ نا فیصلہ خوش آئند و مثبت ئِ، نن سمجھنہ وزیراعظم، آرمی چیف، چیف جسٹس غٹ ئِ تینا آئینی مد ئِ پورو کروئی مرے۔ اوپارے کہ دُن انگا عمل آن ادارہ غاک سوگو مریرہ و ملک اٹی انتشار و بدامنی نا خاتمہ مریک و ملک شون ہلیک۔ اوپارے کہ آپریشن ضرب اسہ اہم ئُ فیصلہ اس ئس ہرا نا جنرل راحیل بنائِ کرے دُن کہ حکومت نا کڑد غٹ آن زیات مس ولے بطور کمانڈر افواج پاکستان جنرل راحیل شریف نا دہت گردی نا چٹفنگ کن کوشست آک ستاکڑزرہ ۔
